Уйғур елидики аталмиш «икки йүзлимичи» кадирлар зәрбә бериш нишаниға айланди

Мухбиримиз ирадә
2017-08-10
Share

Уйғур елида аталмиш «икки йүзлимичи» кадирлар қаттиқ зәрбә бериш нишани болмақта.

Бүгүн тәңритағ торида бай наһийәлик парткомниң муавин секретари, һаким әзиз мәмәтниң очуқ хети елан қилинған болуп, униң очуқ хетидә икки йүзлимичиләргә берилгән тәбир диққәт қозғиди.

У хетидә мундақ дейилгән: «қаттиқ зәрбә бериш мәхсус күришиниң чоңқур қанат яйдурулушиға әгишип, бир түркүм ‹икки йүзлимичи' ләр вә ‹икки йүзлимичилик' әслий қияпитини ашкарилиди. Уларниң бәзилири ғайә вә етиқад җәһәттә чекинди, динға ашкара етиқад қилмиған билән, йошурун етиқад қилди, хизмәттики чағда етиқад қилмиған билән, дәм елишқа чиққанда етиқад қилди; бәзилири диний әсәбий идийәниң сиңип кириши вә ямришини көрмәскә салди, зораванлиқ, террорлуқ мәсилисигә четишлиқ хадимларға даир йип учини сүрүштүрмиди, паш қилмиди; бәзилири бөлгүнчилик, бузғунчилиқ һәрикәтлириниң ‹пәрдә арқисидики қара қол' и вә ‹муһапизәт күнлүки' болуп, зораван - террорчилар билән тил бириктүрди.»

Әзиз мәмәт хетидә йәнә, икки йүзлимичиләрни чоқум вақтида пәрқ етип, уларни қәтий паш қилишни тәшәббус қилған.

Чәтәлләрдики уйғур көзәткүчиләр, юқиридики очуқ хәтниң өзидила уйғур елида инсанларниң дини етиқад әркинлики, пикир әркинлики қатарлиқ әң тәбиий һоқуқлириниң еғир дәпсәндә қилиниватқанлиқини вә бу сәвәблик җинайәтчи муамилисигә учраватқанлиқиниң ениқ ипадиләнгәнликини әскәртти.

Уйғур аптоном район даирилири икки йүзлимичиләргә зәрбә беришни чоңқурлаштурушни қаттиқ тәкитләватқан болуп, техи йеқинда уйғур аптоном районлуқ парткомниң муавин секретари ли пиңшин бу күрәшни чоңқурлаштуруш һәққидә мәхсус йиғин ечип, «үч хил күчләр» вә «икки йүзлимичи» ләргә қарши җәң елан қилишни тәкитлигән иди. Һазирғичә, уйғур елида нурғун уйғур кадирларниң «икки йүзлимичилик» қилиш билән әмилидин елип ташлинип, җазаланғанлиқи мәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт