Uyghur élidiki atalmish "Ikki yüzlimichi" kadirlar zerbe bérish nishanigha aylandi

Muxbirimiz irade
2017-08-10
Élxet
Pikir
Share
Print

Uyghur élida atalmish "Ikki yüzlimichi" kadirlar qattiq zerbe bérish nishani bolmaqta.

Bügün tengritagh torida bay nahiyelik partkomning mu'awin sékrétari, hakim eziz memetning ochuq xéti élan qilin'ghan bolup, uning ochuq xétide ikki yüzlimichilerge bérilgen tebir diqqet qozghidi.

U xétide mundaq déyilgen: "Qattiq zerbe bérish mexsus kürishining chongqur qanat yaydurulushigha egiship, bir türküm 'ikki yüzlimichi' ler we 'ikki yüzlimichilik' esliy qiyapitini ashkarilidi. Ularning beziliri ghaye we étiqad jehette chékindi, din'gha ashkara étiqad qilmighan bilen, yoshurun étiqad qildi, xizmettiki chaghda étiqad qilmighan bilen, dem élishqa chiqqanda étiqad qildi؛ beziliri diniy esebiy idiyening singip kirishi we yamrishini körmeske saldi, zorawanliq, térrorluq mesilisige chétishliq xadimlargha da'ir yip uchini sürüshtürmidi, pash qilmidi؛ beziliri bölgünchilik, buzghunchiliq heriketlirining 'perde arqisidiki qara qol' i we 'muhapizet künlüki' bolup, zorawan - térrorchilar bilen til biriktürdi."

Eziz memet xétide yene, ikki yüzlimichilerni choqum waqtida perq étip, ularni qet'iy pash qilishni teshebbus qilghan.

Chet'ellerdiki Uyghur közetküchiler, yuqiridiki ochuq xetning özidila Uyghur élida insanlarning dini étiqad erkinliki, pikir erkinliki qatarliq eng tebi'iy hoquqlirining éghir depsende qiliniwatqanliqini we bu seweblik jinayetchi mu'amilisige uchrawatqanliqining éniq ipadilen'genlikini eskertti.

Uyghur aptonom rayon da'iriliri ikki yüzlimichilerge zerbe bérishni chongqurlashturushni qattiq tekitlewatqan bolup, téxi yéqinda Uyghur aptonom rayonluq partkomning mu'awin sékrétari li pingshin bu küreshni chongqurlashturush heqqide mexsus yighin échip, "Üch xil küchler" we "Ikki yüzlimichi" lerge qarshi jeng élan qilishni tekitligen idi. Hazirghiche, Uyghur élida nurghun Uyghur kadirlarning "Ikki yüzlimichilik" qilish bilen emilidin élip tashlinip, jazalan'ghanliqi melum.

Toluq bet