Uyghur élidiki bir emeldar: “Ikki yüzlimiler térorchilardinmu qorqunchluq”

Muxbirimiz erkin
2017-09-28
Share

Uyghur aptonom rayonida yerlik emeldarlarning atalmish “Ikki yüzlimichi” lerge qarshi bayanat élan qilip, ipade bildürüshi dawamlashmaqta.

Igilinishiche, qizilsu oblastliq xelq qurultiyi da'imiy komitétining mu'awin sékrétari perhat turdi bügünki bayanatida atalmish “Ikki yüzlimichi” lerni “Térorchilardinmu xeterlik tehdit”, dégen. U, 28‏-séntebir küni “Shinjang géziti” de élan qilghan wedinamiside “Kadirlar qoshunidiki ‛ikki yüzlimichilik‚ qilidighanlar yaki ‛ikki yüzlimichi‚ ler zorawan térorchilardinmu hiyliger, qorqunchluq, qebih we saxtipez. Ularning ziyini, balayi'apiti we buzghunchiliqi téximu éghir bolidu”, dégen. Bu, Uyghur élidiki yerlik emeldarlarning hazirgha qeder élan qilghan siyasiy wedinamiliri ichidiki atalmish “Ikki yüzlimichi” lerni eng shepqetsiz hem shiddetlik sözler bilen teswirligen bayanattur.

Uyghur kishilik hoquq teshkilatlirining bildürüshiche, Uyghur aptonom rayonluq partkomning sékrétari chén chüen'go bu yil 2‏-ayda atalmish “Ikki yüzlimichi” lerge qarshi heriket bashlighandin béri rayonda Uyghurlarning tarixiy, diniy étiqadi, milliy ma'aripi, medeniyiti we hökümetning siyasitige perqliq qaraydighan minglighan yerlik kadirlar, kespiy xadimlar we ziyaliylar jazalan'ghan. Biraq xitay hökümiti hazirgha qeder qanchilik kishining “Ikki yüzlimichilik” bilen jazalan'ghanliqini élan qilip baqmidi.

Uyghur kishilik hoquq teshkilatlirining qeyt qilishiche, xitay qanunlirida “Ikki yüzlimichi” deydighan “Jinayet” bolmighachqa da'iriler, “Ikki yüzlimichi” dep qarighan Uyghurlargha chériklik we parixorluq dégendek “Jinayet” lerni artip jazalimaqtiken.

Perhat turdi bügün “Shinjang géziti” de élan qilghan wedinamiside yene “Ustatliq bilen qilin'ghan gep-sözlerge yoshurun'ghan bölgünchilik idiyesini perq étish” ni, “Aldida bir xil, keynide bir xil bolidighan, körünüshte ita'et qilghan bolup, astirtin xilapliq qilidighan ikki yüzlimichilerni perq étishqa mahir bolush” ni telep qilghan. Biraq u, qandaq gep-sözlerning ustatliq bilen qilin'ghan bölgünchilik idiyesi ikenlikini chüshendürmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet