Bortalada “Ikki yüzlimilik” ni pash qilish uqturushi tarqitildi
2017.10.24
Türlük uchur menbeliridin melum bolushiche, Uyghurlar diyarida hazir “Ikki yüzlimilik” qilghan, dégen eyiblesh sewebidin wezipisidin qalduruluwatqan yaki qamaq jazalirigha duch kéliwatqan Uyghur kadirlarning sani bilen éship mangmaqta iken.
Bortala mongghul aptonom oblasti yéqinda tarqatqan 22-nomurluq uqturush del mushu xildiki “Ikki yüzlimichi” kadirlarni pash qilish mezmunida iken.
Uqturushtin melum bolushiche, oblast tewesidiki herqandaq kishi “Ikki yüzlimilik” ke munasiwetlik qilmishlarni pash qilishi yaki bu heqtiki yip uchini temin étishi lazim iken. Uningda éytilishiche, merkezning yaki aptonom rayonning xizmet orunlashturushliri heqqide qalaymiqan sözligenler, bölgünchilikke qarshi küreshte meydani qet'iy bolmighanlar yaki saxtipezlik qilghanlar, milletler munasiwitige ziyanliq gep-sözlerde bolghanlar, wetenning birliki yaki ijtima'iy muqimliqqa ziyanliq eser yazghanlar, esebiy idiyelerni tarqatqanlar yaki uning tesirige uchrighanlar qatarliq 16 maddiliq mezmundiki herqandaq bir amilni sadir qilghuchilar “Ikki yüzlimilik” bilen eyiblinidiken.
Xoten wilayiti yéqinda “Térrorluq” we “Zorawanliq” qa munasiwetlik yip uchi bilen teminligüchilerni besh milyon somghiche mukapat bilen temin étishni resmiy “(Sinaq) chare” qilip tarqatqan idi. Emdilikte bu xildiki “Ikki yüzlimilik” ni pash qilish uqturushi téximu köp Uyghur kadirlarning “Mollaq” étishidin bésharet bermekte.