Uyghur rayonida “Ikkiyüzlimichilik” ke qarshi heriket dolqunining yene dawamlishidighanliqining shepisi bérildi

Muxbirimiz shöhret hoshur
2017.10.25

19-Qurultayda siyasiy byuroning ezaliqigha teyinlen'gen, Uyghur aptonom rayonning partkom sékrétari chén chüen'go, bügün 19-qurultayning yépilishidin kéyin atalmish shinjang wekiller yighini ötküzüp, 19-qurultayning rohini yetküzüsh heqqide orunlashturush élip barghan.

Muhajirettiki Uyghur közetküchiler chén chüen'goning siyasiy byurogha kirish -kirmeslikini uning nöwette Uyghur rayonida élip bériwatqan tutqun heriketlirining xitay merkizi hökümiti teripidin yenimu jasasetledürüsh yaki jasaretlendürmeslik mesilisi dep qarap kelgen.

Chén chüen'goning mezkur orunlashturushi bilen eyni waqitta Uyghur rayonluq hökümetning aqsu torida élan qilin'ghan bir maqalide, ikkiyüzlimichilerge dawamliq hoshyar bolush, téximu keng pash qilish we adaqqiche küresh qilish teshebbus qilin'ghan. Uyghur rayonida chén chü'en'go dewride bashlan'ghan ikkiyüzlimichilikke qarshi heriket, Uyghurlar ichidiki milliy we diniy mesilide xitaygha aktipliq bilen maslashmighan yuqiri derijilik emeldarlardin tartip yézilarda meschit jama'iti bilen qoyuq munasiwette bolghan partiye ezasigha qeder zerbe nishani bolghan.

Melum bolushiche, bezi yerlik da'iriler nöwettiki jiddiy weziyetni ahalilerge chüshendürgende, sewebni 19-qurultaynng bixeterlikige baghlap chüshendürgen we qurultaydin kéyin weziyettiki jiddiychilikning pesiyidighanliqi yeni yépiq terbiyelesh merkezlirining taqilidighanliqi heqqide shepe bergen. Aqsu toridiki bügünki maqalida yene “Ikkiyüzlimichilerge qarshi tighmu-tigh küresh qilip, bash nishan'gha merkezlishish” teshebbus qilin'ghan.

Muhajirettiki bezi Uyghur közetküchiler, Uyghur nopusining belgilik bir qismini qamaqxanida tutup turuwatqan Uyghur rayoni partkom sékrétari chén chüen'goning siyasiy byurogha kirelishi we aqsu toridiki yuqiriqi chaqiriqlarni, Uyghur rayonidiki jiddiy weziyetning yene dawamlishidighanliqidin bésharet dep qarashmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.