Uyghur élida atalmish “Ikki yüzlimichi” kadirlarni bayqashqa alaqidar chare yolgha qoyuldi

Muxbirimiz irade
2017.12.14

Igilinishiche, Uyghur aptonom rayonluq da'irilerning atalmish “Ikki yüzlimichi” kadirlarni bir terep qilishni dawamliq kücheytmekchi boluwatqanliqi melum bolmaqta.

Bügün “Tengritagh tori” da bérilgen xewerdin melum bolushiche, Uyghur aptonom rayonluq partkom yéqinda partiye ezaliri we kadirlarning siyasiy meydanini közitishni kücheytish üchün ‛‛shinjang Uyghur aptonom rayonluq komitétining közitish xizmitini yolgha qoyush charisi‚‚ ge tüzitish kirgüzüp, uninggha töwendiki mezmunlarni qoshqan:

“Shinjangning emeliyitige birleshtürülüp, bölgünchilikke qarshi turush kürishi, intizamigha xilap qilmishlarni nazaret qilip tekshürüsh, . . . Milliy bölgünchilikke qarshi turush qatarliq chong heq-chong naheq mesililiride meydanidin tewrinish, pozitsiyede susluq qilish, hetta düshmen küchler bilen til biriktürüp, ‛ikki yüzlimichilik‚ qilish, ‛ikki yüzlimichi‚ bolush qatarliq mesililerni tiriship bayqash.”

Uyghur aptonom rayon da'iriliri ötken yildin béri Uyghur élide bolupmu asasiy qatlamda atalmish “Ikki yüzlimichi” lerni tazilash kürishi élip bérip, nurghun Uyghur kadirlarni jazalighan, bezilirini hetta edliye orunlirigha tapshurup bergen. Radiyomiz igiligen uchurlarda herqaysi wilayet we sheherlerde shiddet bilen kéngeytiliwatqan “Terbiyelesh merkezliri” ge yighiwélin'ghan Uyghur kadirlarning mutleq köp qismining oxshash bolmighan derijide “Ikki yüzlimichilik” qilmishigha chétilip qalghanliqtin terbiyiliniwatqanlar ikenliki aydinglashqan idi.

“Ikki yüzlimichilik” ke qarshi turush dolquni Uyghur kadirlarni qattiq wehimige séliwatqan bir peytte, da'irilerning bu xizmetni dawamliq boshashturmay élip bérishni tekitlishi, chet'ellerdiki Uyghur kishilik hoquq pa'aliyetchilirining naraziliqini qozghidi. Ular, Uyghurlar uchrawatqan siyasiy bésimlarning misli körülüp baqmighan derijide küchiyip bériwatqanliqini tekitlimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.