Уйғур дияридики 3 назарәттә “икки йүзлимичи” ләргә қарши сиясий ипадә билдүрүш йиғини өткүзүлгән

Мухбиримиз қутлан
2017.08.20

Хитай һөкүмитиниң уйғур диярида елип бериватқан аталмиш “үч хил күч” вә “икки йүзлимичилик” кә қарши туруш күришиниң барғансери юқири пәллигә көтүрүлүватқанлиқи мәлум болмақта.

“шинҗаң гезити” ниң бүгүнки хәвиригә қариғанда, әмәлдарларниң сиясий ипадә билдүрүш һәрикити 18-авғусттин буян уйғур аптоном районлуқ һөкүмәткә қарашлиқ һәрқайси назарәт вә идарилиригә кеңәйтилгән.

Хәвәрдә дейилишичә, 18-авғуст күни уйғур аптоном районлуқ кадирлар назарити, маарип назарити вә малийә назарити қатарлиқ 3 муһим назарәттә бирла вақитта аталмиш “үч хил күч” вә “икки йүзлимичилик” кә қарши кәскин җәң елип бериш тоғрилиқ әмәлдарларниң сиясий ипадә билдүрүш йиғини ечилған.

Йиғинда юқириқи 3 назарәттә вәзипә өтәватқан нәччә онлиған уйғур әмәлдар сәһнигә чиқирилип, өз әтрапидики аталмиш “үч хил күч” билән “икки йүзлимичи” ләрни қандақ қилип тарихниң “әхләт сандуқиға ташливетиш” һәққидә ипадә билдүргән.

Хәвәрдә дейилишичә, маарип назаритиниң муавин назири мухбул һәсән билән малийә назаритиниң партком секретари вә муавин назири саадәт һәмдулла әң кәскин рәвиштә сиясий ипадә билдүргән.

Көзәткүчиләр, нөвәттә уйғур аптоном районида уйғур әмәлдарларниң өз орнини сақлап қелиш яки қалалмаслиқи уларниң хизмәт иқтидариниң қандақлиқиға әмәс, бәлки хитай компартийисигә болған сиясий садақитиниң қанчиликликигә бағлиқ болуп қалғанлиқини тәкитлимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.