Ilham toxti 2019‏-yilliq rafto mukapatigha namzatliqqa körsitildi

Muxbirimiz erkin
2019-01-28
Élxet
Pikir
Share
Print

Gherb elliridiki birqanche teshkilat 28‏-yanwar bayanat élan qilip, xitay türmisidiki ataqliq Uyghur ziyaliysi ilham toxtining 2019‏-yilliq norwégiye "Rafto kishilik hoquq mukapati" gha namzatliqqa körsitilgenlikini jakarlidi. Bayanatta tekitlinishiche, bu teshkilatlar ilham toxtini "Uyghur xelqining kishilik hoquqigha bolghan endishilirini otturigha qoyush, xitayda milletler otturisidiki tinch di'alogni ilgiri sürüsh jehetlerde körsetken pa'al xizmiti" seweblik bu mukapatqa layiq körgen. Bu qétim ilham toxtini wakaletsiz milletler we xelqler teshkilati, dunya Uyghur qurultiyi we norwégiye Uyghur komitéti qatarliq 3 teshkilat namzatliqqa körsetken. Ular ilham toxti qolgha élin'ghan'gha del 5 yil bolghan bir waqitta uni bu mukapatqa namzatliqqa körsetti. U 2014‏-yili 15‏-yanwar qolgha élin'ghandin béri "Barbara goldsmis erkin yéziqchiliq mukapati", "Martén énnals kishilik hoquq mukapati", "Wéymar kishilik hoquq mukapati" qatarliq dunyadiki bezi nopuzluq mukapatlargha érishken. U yene 2016‏-yili yawropa parlaméntining "Saxarof mukapati" gha namzatliqqa körsitilgen idi. Eger ilham toxti bu yil rafto mukapatigha ériship qalsa u mukapatqa érishken 2‏-Uyghur bolup qalidu. Dunya Uyghur qurultiyining sabiq re'isi, Uyghur rehbiri rabiye qadir xanim bu mukapatqa érishken tunji Uyghur hésablinidu. U 2004‏-yili türmidiki waqtida bu mukapatqa érishken idi.

D u q qatarliq yuqiriqi 3 teshkilatning bayanatta qeyt qilishiche, "Ilham toxtini rafto mukapatigha namzatliqqa körsitish uning mesilisige jem'iyetning diqqitini qozghap, sherqiy türkistandiki kishilik hoquq krizisigha köngül bölüshni algha süridiken". Bayanatta yene "Sherqiy türkistan weziyiti izchil nacharliship, bir milyondin artuq bigunah Uyghur yighiwélish lagérlirida qanunsiz tutup turuluwatqan, Uyghur xelqi misli körülüp baqmighan basturushqa uchrawatqan bir waqitta ilham toxtining hayati we uning xizmiti tinchliq, chüshinish we Uyghurlarning kishilik hoquqi üchün küresh qilishqa ilham béridighanliqi" bildürülgen. Ilham toxti 2014‏-yili yanwarda qolgha élinip, shu yili séntebirde "Bölgünchilik" bilen eyiblinip muddetsiz qamaq jazasigha höküm qilin'ghan idi.

Toluq bet