Amérika dölet mejlis ezaliri ilham toxtini nobél mukapatigha namzat körsetti

Muxbirimiz irade
2019-01-30
Élxet
Pikir
Share
Print

Xitay hökümiti teripidin muddetsiz qamaq jazasigha höküm qilin'ghan Uyghur ziyaliysi ilham toxti amérika dölet mejlisi ezaliri teripidin nobél tinchliq mukapatigha namzat qilip körsitildi.

29-Yanwar küni, amérika dölet mejlisidiki marko rubi'o, kiristofir simit, richard bluméntal, koriy gardnér qatarliq jem'iy 13 neper awam we kéngesh palata ezasi nobél tinchliq mukapati komitétigha imzaliq mektup yollighan.

Ular komitét re'isige yollighan imzaliq mektupida Uyghur ziyaliysi ilham toxtining "Uyghur xelqining kishilik hoquqini qoghdash üchün xitay hökümitini özi belgiligen qanunlargha emel qilishqa chaqirghan we xitaydiki milletler ara chüshinishni ilgiri sürüsh üchün tinchliq bilen pa'aliyet élip barghan bolsimu, emma xitay hökümitining uni naheq yerge ömürlük qamaq jazasigha höküm qilghanliqi" ni bayan qilghan.

2017-Yilidin béri Uyghur élidiki weziyetning yenimu éghirlashqanliqi, xitay hökümitining bir milyondin artuq Uyghurni lagérlargha qamawatqan mushundaq bir shara'itta, Uyghurlarning ilham toxtigha oxshash awazlargha yenimu zor éhtiyajliq ikenliki eskertilgen bu mektupta ilham toxtining nobél tinchliq mukapatigha eng layiq bir namzat ikenliki tekitlen'gen.

Chet'ellerdiki Uyghur közetküchilerning qarishiche, ilham toxtining yuqiridikidek amérika siyaset saheside tesirge ige shexsler teripidin namzatliqqa körsitilishining ehmiyiti zor iken.

Téxi bir kün awwal yeni 28-yanwar küni, gherb elliridiki birqanche teshkilat bayanat élan qilip, ilham toxtini 2019‏-yilliq norwégiye "Rafto kishilik hoquq mukapati" gha namzatliqqa körsetkenlikini jakarlighan idi.

Toluq bet