Җәвһәр дадиси илһам тохтиға берилгән 2016-йиллиқ мартен әнналис кишилик һоқуқ мукапатини тапшурувалди

Мухбиримиз меһрибан
2016-10-11
Share

11-Өктәбир күни мәшһур уйғур зиялийси илһам тохтиниң америкида оқуватқан қизи җәвһәр дадисиға вакалитән, илһам тохтиға берилгән 2016-йиллиқ мартен әнналис кишилик һоқуқ мукапатини шветсарийиниң җәнвә шәһиридә өткүзүлгән мурасимда тапшурувалди.

Мурасим мәйданидин йолланған учурлардин мәлум болушичә, җәвһәр илһам тохти әпәндиниң дости индиана университетиниң тибәтшунас профессори иллиот сперлиң әпәнди билән бирликтә сәһнигә чиқип, дадисиға вакалитән мукапатни тапшурувалған. Җәвһәр тәшәккүр сөзидә “балилиқ дәвримдә дадамниң немә үчүн өзини унтуған һалда бу қәдәр пидакарлиқ билән башқиларға ярдәм қилидиғанлиқини, өз хәлқи үчүн сөзләйдиғанлиқини чүшәнмәйттим. Дадам даим маңа, чоң болғанда чүшинисән дәйтти. Мана һазир дадамниң немә үчүн бу сөзләрни маңа қилғанлиқини чүшәндим. Дадам өз хәлқи үчүн бәдәл төлиди, бундақ болған икән, у һаман әркинликкә еришиду!” дегән.

Бу йил 27-апрел күни илһам тохти әпәнди 1991-йили вапат болған мәшһур кишилик һоқуқ паалийәтчиси мартен әнналист намиға тәсис қилинған “мартен әнналист кишилик һоқуқ мукапати”ға намзат қилип көрситилгән вә 7-айда мәзкур мукапатқа еришидиған ахирқи 4 намзатниң бири болуп талланған иди.

Хитайниң бейҗиң мәркизи милләтләр университетиниң дотсенти илһам тохти әпәнди уйғурларниң қануний һәқлирини ашкара тәләп қилғанлиқи үчүн 2014-йили 23-сентәбир күни хитай һөкүмити тәрипидин муддәтсиз қамақ җазасиға һөкүм қилинған. Илһам әпәнди түрмидә җаза муддитини өтәватқан икки йилдин буян хәлқарада уни қоюп бериш чақириқи күчәйгән вә униңға бирқанчә қетим кишилик һоқуқ мукапатлири берилгән болуп, 2014-йили 5-айда америка қәләмкәшләр җәмийити илһам тохтиға “барбара голдсимис әркинлик мукапати” ни бәргән болса, 2014 йилиниң б д т мәдәнийәт, илим-пән вә маарип тәшкилати тәрипидин “исмаил гаспирали йили” дәп елан қилиниш мунасивити билән, 2014-йили 31-өктәбир күни түрк дуняси журналистлар җәмийити илһам тохти әпәндигә “исмаил гаспирали хәлқаралиқ инсан һәқлири вә журналистлар мукапати”ни бәргән вә илһам тохти әпәнди явропа парламенти тәрипидин 2016-йиллиқ “сахароф әркинлик мукапати” ниң намзати қилип көрситилгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт