Ilham toxtigha mukapat bergen gérmaniye wéymar shehirining tor békiti hujumgha uchrighan

Muxbirimiz erkin
2017-11-06
Share

Gérmaniye wéymar sheherlik hökümetning "Wéymar kishilik hoquq mukapati" tori tor buzghunlirining hujumigha uchrighan. Xewerlerde, tor hujumi wéymar shehirining 2017‏-yilliq "Kishilik hoquq mukapati" ni türmidiki ataqliq Uyghur öktichi ziyaliy ilham toxtigha bergenliki bilen munasiwetlik, dep qaraldi.

Wéymar sheherlik parlaménti bu yil 7‏-ayning bashlirida birdek qarar maqullap, 2017‏-yilliq "Wéymar kishilik hoquq mukapati" ning ilham toxtigha layiq körülgenlikini élan qilghan. Wéymar sheherlik hökümet shu munasiwet bilen élan qilghan bayanatida, "Mukapat ilham toxtining tinchliq, di'alog chaqiriqini yangritip, uning qoyup bérilishige türtke bolushini ümid qilimiz" dégen idi.

Wéymar sheherlik hökümet da'irilirining bildürüshiche, sheherlik hökümet tor békitining "Wéymar kishilik hoquq" béti 3‏-noyabir küni tor buzghunlirining hujumigha uchrap, uning mezkur béti pütünley taqilip qalghan.

Tor békitining bir mes'uli düshenbe küni axbarat wastilirigha bergen uchurida, tor hujumining saqchigha melum qilin'ghanliqi, hujumning qeyerdin kelgenliki hazirche melum emeslikini bildürgen. Biraq, d u q bilen "Xitayda özgirish" namliq kishilik hoquq teshkilati tor hujumida xitayning qoli barliqini ilgiri sürdi. D u q, "Sheksizki, bundaq hujum xitaydin kélidu" dégen.

"Wéymar kishilik hoquq tor béti" ning mes'ulining radi'omizgha bildürüshiche, wéymar shehiri bu yil 7‏-ayda mukapatning ilham toxtigha bérilgenlikini élan qilghandin buyan, ularning tor békiti izchil hujumgha uchrap turghan. U, bu qétimqi hujumda tor békiti 3 yildin béri yighqan matériyallirining yoqap ketkenlikini bildürgen. Uning qeyt qilishiche, wéyrmar shehiri ilham toxtigha mukapat bérish munasiwiti bilen xitayning bésimigha uchrimighan bolsimu, biraq xitay diplomatik qanallar arqiliq gérmaniye hökümitige naraziliq bildürgen.

Wéymar shehirining 2017‏-yilliq "Kishilik hoquq mukapati" ni tarqitish murasimi 10‏-dékabir "Xelq'ara kishilik hoquq küni" ötküzülidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.