Илһам тохти хитай даирилириниң уйғурларға террорлуқ қалпиқи кийгүзүватқанлиқини әйиблиди

Мухбиримиз меһрибан
2013-11-18
Share

Узундин буян уйғурларниң һоқуқ-мәнпәәтини очуқ-ашкара тәшәббус қилип кәлгән зиялий илһам тохти әпәнди, 16-ноябир сериқбуя вәқәсидин кейин, өз қарашлирини баян қилип, хитай һөкүмәт даирилирини "уйғурларға террорлуқ қалпиқи кийгүзмәслик" кә чақирди.

Илһам тохти әпәнди сериқбуя йезисида йүз бәргән "23-апрел вәқәси" вә "16-ноябир вәқәси" ниң йүз бериш сәвәби һәққидә һөкүмәт даирилириниң ениқ мәлумат бәрмигәнликини билдүрүп, бу вәқәләрниң тәпсилатиниң ашкарилиниши керәкликини тәкитләп "бу вәқәләрниң тәпсилатлири ашкарилиниши керәк, оққа тутушқа буйруған башлиқтин, оққа тутқан сақчиларғичә һәммә тәпсилий җәрян аммиға ашкарилиниши керәк" деди.

Илһам тохти әпәнди йәнә вәқә һәққидики гуманини баян қилип, "бу қетимқи вәқәдиму алдинқи қетимқиға охшаш нурғунлиған ениқ болмиған вә гуманлиқ нуқтилар бар. Әмма ениқки, бу хил тоқунушлар үзлүксиз йүз бериватиду, уйғурлар вә хәнзуларда вә башқа кишиләрдә өлүш-ярилиниш әһваллири көрүлүватиду" дегән.

Уйғурбиз тори вә дуня авази блогиниң хәвиридә йәнә, илһам тохти әпәндиниң хитай даирилириниң вәқәни террорлуқ һуҗуми дәп бекиткәнликигә қарита соаллири вә тәнқидлири мундақ нәқил елинған. "сериқбуя йезисида зади немә иш йүз бәрди? һәқиқий әһвал зади қандақ? мениңчә, каллиси сақ адәм бу вәқәни террорлуқ һуҗум дәп қаримайду. Бу хил вәқәләр үзлүксиз йүз бериватиду, әҗәба һөкүмәт ойлиниши керәк әмәсму? немишқа қолида пичиқила бар уйғурлар қолида қорали болған сақчилар билән тиркишиду? йәнә 9 адәм өзини өлүмгә тутуп берипту. Йәрлик даириләр бу хил вәқәниң қайта йүз беришиниң алдини елишни ойлишип бақмиди, һазирғичә йүргүзүватқан сиясәтлири тоғрисида ойлинип бақмиди."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт