Ili déhqanliri rayondiki qara yamghur-kelkün'ge boran apitiningmu qoshulghanliqini bildürdi

Muxbirimiz méhriban
2016-06-28
Share

Radiyomizgha ehwal inkas qilghan Uyghurlarning bildürüshiche, ili wadisida 6-ayning 17-küni bashlan'ghan apet xaraktérlik qattiq yamghur yenila dawamlishiwatqan bolup, 10 kündin buyanqi yamghur kelkün apitige 26-, 27- iyun künliridiki qattiq boran qoshulup, ghulja nahiyisidiki déhqanlarning zira'etlirini we méwilik baghlirini éghir weyranchiliqqa uchratqan.

Emma, xitayning hökümet taratqulirida peqet 17- iyun künidiki qara yamghur we yamghurdin kéyinki kelkün heqqide xitayning shinxu'a agéntliqining 19- iyundiki xewiridin neqil élip bérilgen xewerlerdin bashqa ili rayonidiki apetning emeliyiti heqqide yerliktin igiligen tepsiliy melumatlar bérilmidi. Radiyomiz ziyaritini qobul qilghan déhqanlar bolsa 10 kündin buyan dawamlishiwatqan normalsiz hawa rayi hadisiliri heqqide toxtilip, kün arilap dégüdek yéghiwatqan güldürmamiliq qara yamghur, yamghur toxtighandin kéyinki 40 giradusqa yéqin ziyade issiq nem hawa we yekshenbe, düshenbe künliridiki qattiq boranning déhqanlarning bu yilqi küzlük hosul arzusini pütünley yoq qilghanliqini, onyar, choluqay, supitay qatarliq yézilardiki nurghun déhqanning soqma tamdin sélin'ghan öyliri we mal qotanlirining qattiq yamghur we kelkünde su astida qélip örülüp ketkenlikini bildürdi.

Özliridiki wehimining barghanche küchiyiwatqanliqini bildürgen déhqanlar, hökümet ewetken kadirlar öy-öylerge kirip déhqanlarning ziyan ehwalini igilewatqan bolsimu, emma hökümet bérishni wede qilghan tölemning déhqanlarning bu qeder éghir ziyanlirini toldurushqa imkansizliqini, nöwette déhqanlarning téximu éghir künlerning yüz bérishidin ensiresh ichide turuwatqanliqini bildürüshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet