Сақчи башлиқи, «инқилабий қурбан» мәмәтҗан тохтиниязниң бурун бирқанчә гумандарни кевәзликтә етивәткәнлики ашкариланди

Мухбиримиз шөһрәт һошур
2017-04-05
Елхәт
Пикир
Share
Принт

2015-Йили бай көмүркан һуҗумчилириниң қолида өлгән вә хитай җ х министирлиқи тәрипидин мәмликәт бойичә биринчи дәриҗилик қәһриман дәп нам берилгән ақсу вилайәтлик сақчи идарисиниң муавин башлиқи мәмәтҗан тохтиниязниң, өлүмидин 15 йил аввал бир қетимлиқ из қоғлаш опиратсийәсидә бир гуруһ гумандарни кевәзликтә етивәткәнлики ашкариланди.

Бу учур тәңритағ торидики аталмиш инқилабий қурбан мәмәтҗан тохтиниязға беғишлап йезилған «Тәңритағда җулаланған садақәтмәнлик роһи, чокантал байримида яд етилгән қәһриман» Мавзулуқ мақалидә ашкариланди.

Мақалидә дейилишичә, мәмәтҗан тохтиниязниң бир гуруһ гумандарни кевәзликтә етиветиш вәқәси 2000-йили йүз бәргән, вәқә йүз бәргән күни мәмәтҗан тохтинияз бир яки бирқанчә сақчи билән аталмиш террорчилар гуруһини қорусида қоршавға алған; гумандарлар сақчилардин бириниң қолидики қоралини елип қачқан, мәмәтҗан тохтинияз гумандарларни 5 километирғичә арқисидин қоғлиған вә бир кевәзликкә кәлгәндә йетишип, гумандарларни етип ташлиған вә тартивелинған қорални яндуруп әкелип хизмәт көрсәткән. Хәвәрдә етиветилгән гумандарларниң сани, кимлики вә қилмиши һәққидә мәлумат бәрмигән.

Хитай даирилири уйғур районида аталмиш террор гумандарлирини нәқ мәйданда етиветиш әмрини, 5-июл вәқәсидин кейин йәни җаң чүншйән дәвридә рәсмий елан қилған. Тәңритағниң бүгүнки хәвиридә мәмәтҗан тохтиниязниң гумандарларни нәқ мәйданда етиветиш қилмиши, «дөләткә болған садақәтмәнлик» дәп мәдһийиләнгән.

Бай көмүркан һуҗуми 2015-йили 18-сентәбир күни йүз бәргән. Һуҗумчилар из қоғлап кәлгән мәмәтҗан тохтинияз билән 4 чарвичини гөрүгә еливалған, булардин мәмәтҗан тохтиниязни өлтүрүп, қалғанлирини қоюп бәргән иди.

Пикирләр (0)
Share
Толуқ бәт