Saqchi bashliqi, "Inqilabiy qurban" memetjan toxtiniyazning burun birqanche gumandarni kéwezlikte étiwetkenliki ashkarilandi

Muxbirimiz shöhret hoshur
2017-04-05
Élxet
Pikir
Share
Print

2015-Yili bay kömürkan hujumchilirining qolida ölgen we xitay j x ministirliqi teripidin memliket boyiche birinchi derijilik qehriman dep nam bérilgen aqsu wilayetlik saqchi idarisining mu'awin bashliqi memetjan toxtiniyazning, ölümidin 15 yil awwal bir qétimliq iz qoghlash opiratsiyeside bir guruh gumandarni kéwezlikte étiwetkenliki ashkarilandi.

Bu uchur tengritagh toridiki atalmish inqilabiy qurban memetjan toxtiniyazgha béghishlap yézilghan "Tengritaghda julalan'ghan sadaqetmenlik rohi, chokantal bayrimida yad étilgen qehriman" mawzuluq maqalide ashkarilandi.

Maqalide déyilishiche, memetjan toxtiniyazning bir guruh gumandarni kéwezlikte étiwétish weqesi 2000-yili yüz bergen, weqe yüz bergen küni memetjan toxtiniyaz bir yaki birqanche saqchi bilen atalmish térrorchilar guruhini qorusida qorshawgha alghan؛ gumandarlar saqchilardin birining qolidiki qoralini élip qachqan, memetjan toxtiniyaz gumandarlarni 5 kilométirghiche arqisidin qoghlighan we bir kéwezlikke kelgende yétiship, gumandarlarni étip tashlighan we tartiwélin'ghan qoralni yandurup ekélip xizmet körsetken. Xewerde étiwétilgen gumandarlarning sani, kimliki we qilmishi heqqide melumat bermigen.

Xitay da'iriliri Uyghur rayonida atalmish térror gumandarlirini neq meydanda étiwétish emrini, 5-iyul weqesidin kéyin yeni jang chünshyen dewride resmiy élan qilghan. Tengritaghning bügünki xewiride memetjan toxtiniyazning gumandarlarni neq meydanda étiwétish qilmishi, "Döletke bolghan sadaqetmenlik" dep medhiyilen'gen.

Bay kömürkan hujumi 2015-yili 18-séntebir küni yüz bergen. Hujumchilar iz qoghlap kelgen memetjan toxtiniyaz bilen 4 charwichini görüge éliwalghan, bulardin memetjan toxtiniyazni öltürüp, qalghanlirini qoyup bergen idi.

Toluq bet