"CECC" yéngi doklati: Uyghur élida "Insaniyetke qarshi jinayetler, hetta irqiy qirghinchiliq yüz bériwatqan bolushi mumkin"

Muxbirimiz irade
2021-01-14
Share

Amérika dölet mejlisining xitay ishliri ijra'iye komitéti (CECC) yéngi doklatida, Uyghur élida "Insaniyetke qarshi jinayetler, hetta téxi irqiy qirghinchiliq yüz bériwatqan bolushi mumkinliki" toghrisida yéngi ispatlar barliqini éytti.

Xitay ishliri ijra'iye komitéti 14-yanwar küni resmiy élan qilghan doklatida, xitay hökümitining Uyghur élida atalmish "Kespiy terbiyilesh merkizi" namidiki lagérlarni qurup Uyghurlargha sistémiliq ziyankeshlik qilghanliqini qattiq eyibligen. Shundaqla yene xitay yene amérikada yashawatqan Uyghurlarni parakende qildi, dep tenqid qilghan.

Amérika dölet mejlisidiki her ikki partiye ezaliridin teshkillen'gen bu komitét doklatta yene amérika hökümitidin derhal Uyghur élida "Wehshiylikning sadir qilin'ghan-qilinmighanliqi toghrisida qarar chiqirish" telep qilghan. Amérika hökümiti adette bundaq telepke 90 kün ichide jawab bérishi kérek iken.

Xitay ishliri ijra'iye komitéti re'isi, awam palata ezasi jim makgowérn xitay hökümitining ötken bir yildiki kishilik hoquq xatirisini "Kishini chöchütidighan derijide we misli körülmigen" dep bahalash bilen birge, amérika dölet mejlisidin we kelgüsi baydin hökümitidin béyjingni jawabkarliqqa tartishni telep qilghan.

Uyghur élidiki zulumgha a'it delil-ispatlarning köplep ashkarilinishi bilen xitay hökümitining Uyghur élida ijra qiliwatqanlirini "Irqiy qirghinchiliq" dep atash barghanséri omumlishiwatqan idi. Téxi bu yil 10-ayda amérikaning dölet bixeterlik meslihetchisi robért obrayin bir qétimliq sözide "Rayonda irqiy qirghinchiliqqa intayin yéqin ishlar yüz bériwatidu," dégen.

Roytérs agéntliqining bu heqtiki xewiride éytilishiche, hazir amérika hökümitige rayonda yüz bériwatqanlargha munasip isim qoyush heqqide küchlük bésim bar iken. Emma buning qachan netije béridighanliqi éniq emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet