Вийеннада иранниң ядро программисиға аит сөһбәт башланди

Мухбиримиз үмидвар
2014-07-13
Елхәт
Пикир
Share
Принт

Америка дөләт ишлири министири кәрри алтә дөләтниң иран билән өткүзидиған сөһбитигә қатнишиш үчүн австрийәниң вийенна шәһиригә йетип кәлди.

Америка дөләт ишлири министири җон кәрри йәкшәнбә күни виеннада пикир баян қилип, иранниң ядро қораллирини тәрәққий қилдурмаслиқи һәққидә чоқум вәдә бериши керәклики, буниң интайин муһимлиқини тәкитлигән.

Америка авазиниң йезишичә, америка дөләт ишлири минситир кәрриниң сөзи бойичә алғанда иранниң ядро программисиға аит көплигән мәсилиләр йәнила һәл қилинмиған һалда қелиши мумкин.

Иран билән ядро мәсилисигә аит сөһбәткә қатнашқан бир нәпәр америка юқири дәриҗилик әмәлдариниң ейтишичә шәнбә күнидики сөһбәттә бәзи илгириләшләр болған болсиму, әмма ачқучлуқ мәсилиләрдә йәнила ихтилаплар мәвҗут.

Әгәр бәзи муһим ачқучлуқ мәсилиләрдә илгириләш болмиса, әң ахирқи мөһләт, йәни 7 - айниң 20 - күнидин кейин сөһбәт вақтини узартиш қийин икән.

Вийеннада алтә дөләтниң иран билән ядро мәсилиси бойичә өткүзидиған сөһбитигә америка, фирансийә, әнглийә вә германийә ташқи ишлар министирлири қатнашқан, әмма хитай билән русийә пәқәт муавин ташқи ишлар министирлиринила қатнаштурған.

Бирләшмә агентлиқиниң йезишичә, кәрри йәнә германийә ташқи ишлар министири франк валтер стейнмеир билән айрим сөһбәтлишидикән.

Мәлум болушичә иран билән болидиған сөһбәт бир һәптә давамлишидиған болуп, сөһбәт нәтиҗисидә нөвәттә иран мәвҗут вақитлиқ келишимниң орниға иранниң ядро программисини тәрәққий қилдурушни контрол қилидиған узун муддәтлик келишим һасил қилиниши керәк икән.

Америка қатарлиқ ғәрб дөләтлири иранниң ядро қорали ясашқа урунуватқанлиқини тәнқид қиливатқан болуп, әмма иран тәрәп өзиниң ядро программисиниң пәқәт тинчлиқ үчүн икәнликини билдүрүп, өз мәвқәсидә турмақта иди.

Толуқ бәт