Ирақ баш министири, даеш үстидин ғәлибә қилғанлиқини елан қилди

Мухбиримиз әркин
2017-07-10
Share

Ирақ баш министири һәйдәр әл-абади дүшәнбә күни ирақ бихәтәрлик күчлириниң аталмиш ислам дөлити даеш үстидин ғәлибә қилғанлиқини җакарлиди.

Абади дүшәнбә күни мосул кона шәһирини азад қилған ирақ аманлиқ күчлирини көздин кәчүргәндә, ирақ байриқини көтүрүп, даеш террорлуқ дөлитиниң йоқалғанлиқини рәсмий елан қилди.

Ирақ бихәтәрлик күчлири дүшәнбә күни даешниң мосул кона шәһәр районини игиләп турған ахирқи қалдуқ күчини йоқатқан. Мосулни азад қилиш уруши 9 ай давам қилди. Бу җәрянда нурғун қурулуш вәйран болған, миңлиған инсан өлгән, бир милйонға йеқин адәм өй-макансиз қалған.

Америка башчилиқидики иттипақдаш күчләр қоманданлириниң билдүрүшичә, мосул шәһирини елиш уруши 2‏-дуня урушидин бери елип берилған әң шиддәтлик шәһәр уруши болуп қалған. Бирақ абади, хәвпниң йәнә мәвҗутлуқини агаһландуруп, “бизниң йәнә бир вәзипимиз бар. У болсиму муқимлиқ бәрпа қилиш, қурулуш елип бериш вә даешниң қалдуқлирини тазилаш” дәп көрсәтти.

Б б с ниң хәвәр қилишичә, америка башчилиқидики иттипақдаш күчләр, мосул кона шәһиридә миналарни тазилашқа, даеш қалдуқ күчлирини йоқитишқа тоғра келидиғанлиқини билдүргән.

Ирақдики америка армийәсиниң қомандани стефан товсенд, “бу ғәлибиниң өзи ялғуз даешни йоқиталмайду. Алдимизда йәнә шиддәтлик урушлар йүз бериду. Бирақ даеш икки пайтәхтиниң биридин айрилди. Аталмиш хәлипиликниң парлақ күнлириниң йәнә келиши тамамән имкансиз” дегән.

Даеш қораллиқ күчлири мосулни 2014‏-йили 6‏-айда ишғал қилған. Даешниң хәлиписи абу бәкир әл бағдади дәл 2014‏-йили 7‏-айда мосулдики мәшһур әл нури тарихий мәсчитидә өзини “ислам дөлити” ниң хәлписи дәп елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт