Amérikaning sabiq diniy ishlar elchisi xelq'ara jem'iyetni Uyghur "Irqiy qirghinchiliqi" ni étirap qilishqa chaqirghan

Muxbirimiz erkin
2021-07-01
Share

Amérikaning sabiq diniy ishlar bash elchisi sam browénbek bilen Uyghur herkiti teshkilatining mes'uli roshen abbas "Washin'gton waqti" gézitining 30-iyundiki sanida maqale élan qilip, xelq'ara jem'iyetni xitayning Uyghurlargha tutqan mu'amilisini "Irqiy qirghinchiliq" dep étirap qilishqa ‍ündigen.

Maqalide fransiyediki lagér shahiti gülbahar xatiwajini kechmishi we 2018-yili ürümchide tutqun qilinip hazirgha qeder ‍iz-dériki bolmighan doxtur gülshen ‍abbasning mesilisi chiqish nuqtisi qilinip, Uyghur ayallirining qorqunchiliq ziyankeshlikke duch kéliwatqanliqi yorutup bérilgen.

"Uyghurlar duch kelgen dehshetke jawap bérish" mawzuliq mezkur maqalide "Xitay kompartiyesining mejburiy tughmas qilish herkiti lagérlardiki Uyghur ayalliri duch kelgen eng qebih wehshiliklerning biri" ikenliki, "Ayallargha okul sélip ularni tughmas qilishqa da'ir doklatlar" xitayning axiriqi meqsitining "Uyghur millitini yoqitish" ikenliki tekitlen'gen.

Maqalining axrida yene mundaq déyilgen: "Biz xelq'ara jem'iyetni amérika, en'giliye, gollandiye we kanada hökümetliridek bu wehshilikni '‍irqiy qirghinchiliq' dep békitishke ündeymiz. Biraq biz téximu köp ishlarni qilishimiz kérek. Gülbuhargha oxshash shahitlar dunyaning qalghan qismini öz wetinide dehshetlik wehshilikke duch kelgen Uyghurlar bilen baghlap turidu. Ularning hékayisini anglash, ularning adimiylikini qoghdash hazir bizning mes'uliyitimiz.".

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet