Uzay bulut: "Kommunist xitay Uyghur ziyaliylirini irqiy qirghinchiliq usulida basturuwatidu"

Muxbirimiz jewlan
2021-07-05
Share

Xitayning texminen 500 din artuq Uyghur ziyaliysini qamap, milletning serkiliri hésablan'ghan bu kishilerni öz xelqidin ayriwétishi irqiy qirghinchiliqning bir ispati süpitide xelq'ara jem'iyetning diqqitide bolup kelmekte.

Türkiyelik muxbir, gétston institutining aliy tetqiqatchisi uzay bulut 4-iyul mezkur institut tor bétide maqale élan qilip, xitay hökümitining Uyghur ziyaliylirigha irqiy qirghinchiliq usulida ziyankeshlik qiliwatqanliqini tepsiliy bayan qilghan. U bu maqaliside Uyghur qelemkeshler jem'iyiti we bashqa menbelerdin igiligen melumatlargha asasen, xitay hökümitining 2017-yildin bashlap 500 din artuq Uyghur ziyaliysini türme we lagérlargha qamighanliqini, bu ziyaliylarning köpinchisining Uyghur tili we medeniyitige töhpe qoshup kéliwatqan milletsöyer yazghuchi-sha'irlar ikenlikini alahide tilgha alghan.

U xelq'ara ilim saheside aktip pa'aliyet qilip, Uyghurlarni tonushturup kelgen tetqiqatchi rahile dawut, Uyghurlarning meniwi hayatigha tesiri körsitip kéliwatqan sha'ir-yazghuchilardin abduqadir jalalidin, extem ömer, haji mirzahid kirimi (lagérdin chiqip ölüp ketken), adil tuniyaz, medeniyet-ma'arip saheside közge körün'gen ziyaliy exmetjan jüme, abduqadir jüme (her ikkkisi erkin asiya radiyosi Uyghur bölümining mu'awin mudiri memetjan jümening inisi) qatarliqlarni xitay hökümiti meqsetlik qarilap ziyankeshlik qilghan ziyaliylar qatarida körsitip ötken.

U maqalisining axirida, xitay hökümiti shunche köp Uyghurni we ularning ziyaliylirini irqiy qirghinchiliq usulida basturuwatqan hem qiynawatqan ehwalda pütün dunyaning, bolupmu musulmanlar dunyasining sükütte turuwatqanliqini qattiq eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet