Uyghur irqiy qirghinchiliqini téma qilghan chong kölemlik xelq'ara yighin en'giliyede bashlandi

Muxbirimiz erkin
2021-09-01
Share

Xelq'aradiki dangliq tetqiqatchilar we adwokatlar 1-séntebir küni en'giliyediki siyasiyonlar hem kishilik hoquq teshkilatliri bilen bille chong kölemlik yighin ötküzüp, xitay hökümitining Uyghurlargha qaratqan irqiy qirghinchiliqi we buni toxtitishning yollirini muzakire qilishqa bashlighan. En'giliyening nyu-kesul uniwérsitétide ötküzülgen bu yighin hazirgha qeder Uyghur ‍irqiy qirghinchiliqini téma qilghan kölem jehettin eng chong yighin bolup hésablinidiken.

Birleshme agéntliqining xewer qilishiche, üch kün dawamlishidighan bu yighinda en'giliyelik sotchilar, parlamént ezaliri, Uyghurshunaslar we irqiy qirghinchiliq mutexesisslirini ‍öz ichige alghan nurghun kishiler söz qilidiken. Ular xitay hökümitining Uyghurlarni nishan qilghan wehshiliklirige, jümlidin mejburi emgek, mejburi tughut cheklesh we diniy basturushqa a'it delillerni, shundaqla bu basturushlarni toxtitish üchün xelq'ara heriket qollinishning yollirini muzakire qilidiken.

Yighinni uyushturghan nyu-kesul uniwérsitétining tetqiqatchisi, ataqliq Uyghurshunas jo simis finléy xanim yighinning échilishida söz qilip: "Biz bu yighinning noqul bir ilmay pa'aliyet bolupla qalmasliqini ümid qilimiz. Biz yene bu yerdiki barliq kishilerni uyushturush arqiliq ularning tejrbisi bilen tesirini ishqa sélip, xitaygha qarita bésimni kücheytishini, xitayning Uyghur xelqige dawamliq ziyankeshlik qilishigha xatime bérishning yolliri üstide pikir yürgüzüshni ümid qilimiz," dégen.

Uning éytishiche, Uyghurlar mesilisi "Künséri jiddiylishiwatqan insaniyet kirizisidiki bir chong apet" iken. U sözide yene gérmaniyelik Uyghurshunas adriyan zénzning bu yighinda xitayning Uyghur nupusini zorluq bilen azaytish pilanigha a'it resmiy hökümet höjjetlirini otturigha qoyudighanliqini bildürgen. Adiyan zénz yéqinda mexsus maqale élan qilip, xitayning 2040-yiligha qeder 4 yérim milyon Uyghur nopusini azaytishni pilanlighanliqini ashkarilighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet