Әнгилийә ташқий ишлар министири шәхси сөһбәттә хитайниң уйғурларға қилғанлирини "ирқий қирғинчилиқ" дегән

Мухбиримиз әркин
2021-11-01
Share

Әнгилийә ташқий ишлар министири лиз трус бир шәхсий сөһбәттә хитайниң уйғурларға тутқан муамилисини "ирқий қирғинчилиқ" дәп әйибләп, хитайға қарита сабиқ әнглийә ташқий ишлар министири доминик рабтин пәриқлиқ позитсийәдә болған. Доминик раб илгири хитайниң уйғурларни дәпсәндә қилишини қаттиқ әйиблигән болсиму, бирақ у һечқачан "ирқий қирғинчилиқ" дегән сөзни қолланмиған. Раб хәлқара җамаәтниң бу сөзни қоллиништа иһтиятчан болушини тәкитләп кәлгән иди.

Бирақ әнгилийә "експрәс" гезитиниң ейтишичә, лиз трус бу сөзни қоллиништа доминик раб вә баш министир борис җонсонға қариғанда техиму кәскин икән. "екиспрәс" гезитиниң хәвиридә, лиз трусниң хитайда турушлуқ әнгилийә баш әлчиси королин вилсон билән көрүшкәндә униңға өзиниң бу мәсилидики көз қаришини ейтқанлиқини билдүргән.

"екиспрәс" гезитиниң ейтишичә, каролин вилсон өткән йили 10-айда хитайға баш әлчиликкә тәйинләнгәндә лиз трус билән көрүшкән. У вақитта лиз трус әнглийәниң хәлқара сода министири болуп, у хитайға әнгилийәниң "франсийәгә қилған муамилисини қилишқа болмайдиғанлиқи" ни билдүргән.

Вәқәдин хәвәрдар затларниң "експрәс" гезитигә ейтишичә, каролин вилсон, лиз трустин хитайға немә ‍үчүн франсийәгә қилған муамилини қилишқа болмайдиғанлиқини сориған болуп, лиз трус: "чүнки франсийә ирқий қирғинчилиқ қилмиди" дәп җавап бәргән. Әнглийә парламенти бу йил 4-айда хитайниң уйғурларға тутқан муамилисини "ирқий қирғинчилиқ" дәп етирап қилған болсиму, бирақ әнглийә һөкүмити буни "ирқий қирғинчилиқ" дейиштин өзини қачуруп кәлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт