Memtimin ela: "Shi jinpingning Uyghurlargha yürgüzgen irqiy qirghinchiliqi"

Muxbirimiz irade
2018-11-08
Élxet
Pikir
Share
Print

"Tashqi siyaset" zhurnilining 7-noyabir künidiki sanida "Shi jinpingning Uyghurlargha yürgüzgen irqiy qirghinchiliqi" mawzuluq bir chong tiptiki maqale élan qilindi.

Maqalini awstraliyediki Uyghur ziyaliysi, doktor memtimin ela ependi yazghan bolup, u bu maqalisi arqiliq xitay hökümitining Uyghurlargha medeniyet qirghinchiliqi yürgüzüwatqanliqi we buning arqisidiki eng chong pilanlighuchining xitay dölet re'isi shi jinping ikenlikini körsetken.

Memtimin ela maqaliside xitay hökümiti "Kespiy terbiyelesh orni" ikenlikini ilgiri sürüwatqan bu orunlarni dawamliq kéngeytiwatqan bir shara'itta lagérlargha qamalghan Uyghurlarning öyige qaytip, a'ilisi bilen, ata-ana we perzentliri bilen qayta jem bolidighanliqidin ümid yoqlighini, qisqisi, Uyghurlar hayatining asta-asta, biraq muqerrer halda bir qebihlikning qurbanigha ayliniwatqanliqini tekitligen. Maqalide yene mushundaq bir qebih pilanning bash layiheligüchisi bolghan shi jinpingning xelq'araning diqqet neziridin saqit bolup qéliwatqanliqini eskertken.

U shi jinpingning Uyghurlargha medeniyet qirghinchiliqi yürgüzüshtiki seweblerni tehlil qilghanda, uning "Junggo chüshi", "Bir belwagh bir yol" qurulushi arqiliq yawropagha chiqish pilanini ishqa ashurush üchün Uyghurlarni yoqitishni zörür dep qarighanliqini, mana shu seweblik Uyghurlarni lagérgha solash, medeniyet qirghinchiliqi yürgüzüsh arqiliq "Uyghur mesilisi" ni "Yiltizidin hel qilish" ning meniwi we maddiy shara'itlirini teyyarlap chiqqanliqini misallar bilen bayan qilghan.

Memtimin ela ependining qarishiche, shi jinpingning insanlargha, jümlidin Uyghurlargha qebih we zalimlarche mu'amile qilishida uning baliliq waqitlirida uchrighan éghir rohiy zerbilerningmu roli bar iken. Biraq shi jinping nahayiti pilanliq we nahayiti ustiliq bilen özining insaniyetke qarshi élip bériwatqan jinayetlirining jawabkarliqidin yoshurup qalmaqta iken.

Toluq bet