2009-Йили алий мәктәп пүттүргән ишсиз яшларниң 85% и аз санлиқ милләт иди

Мухбиримиз үмидвар
2015.05.27
Share on WhatsApp
Share on WhatsApp

Хитай мәтбуатлири 2009-йили үрүмчи вәқәси йүз бериш алдида пүтүн уйғур аптоном районидики алий мәктәп вә оттура дәриҗилик техникомларни пүттүрүп, ишсиз қелип, өзлирини тизимға алдурған 75 миң нәпәр яшниң 85.3%ni Аз санлиқ милләтләр тәшкил қилғанлиқини ашкарилиди.

“шинҗаң гезити” ниң хәвәр қилишичә, 2010-йили хитай мәркизий һөкүмитиниң “шинҗаң хизмәт йиғинидин кейинки орунлаштуруш бойичә уйғур аптоном районлуқ партком мәхсус кеңәйтилгән йиғини чақирип, оқуш пүттүрүп ишсиз қалған бу яшларни икки йил ичидә ишқа орунлаштурушни асасий җәһәттин һәл қилишни қарар қилған вә 2011-йили мәзкур 75 миң нәпәр ишсиз яшни асасий җәһәттин ишқа орунлаштуруп болған.

Уйғур көзәткүчилири вә хәлқара мәтбуатлар 2009-йилидики үрүмчи вәқәси йүз бериштин илгири уйғур елида уйғур яшлириниң ишсизлиқ әһвалиниң еғирлишип кәткәнлики, һәммә йәрләрдики иш орунлирини хәнләрниң игиләп, көплигән уйғур қатарлиқ хитай әмәс милләт яшлириниң ишсиз қалғанлиқи һәққидә көп инкасларни хәвәр қилған иди.

Хәлқара кишилик һоқуқ тәшкилатлири вә көзәткүчиләр 5-июл үрүмчи вәқәсиниң келип чиқиши сәвәблиридиму әнә шу яшларниң ишсизлиқи вә уйғурларниң миллий кәмситишкә учришиниң муһим орунда икәнликини оттуриға қойған иди. Үрүмчи вәқәсидә йүзлигән яшларниң хитай дөләт байриқини көтүрүп намайиш қилип, уйғур хәлқигә, җүмлидин әнә шу ишсиз қалған уйғур яшлириға баравәр муамилә тәләп қилсиму, бирақ қораллиқ сақчиларниң бастурушиға учриғанлиқи оттуриға қоюлған иди.

Хитай мәтбуати 2010-йилидин 2014-йилиғичә 300 миңдин артуқ адәттики алий мәктәпләрни пүттүргәнләрни ишқа орунлаштурғанлиқини, 2010-йилидин таки һазирғичә җәмий 2милйон 490 миңдин артуқ адәмни ишқа орунлаштуруп болғанлиқини хәвәр қилди. Лекин, мәзкур рәқәмниң ичидә уйғурларниң қанчилик салмақни игилигәнлики һәққидә һечнемә дейилмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.