Da'irilerning Uyghur we bashqa yerlik milletlerning isim-famililirini xitayche yéziqta qéliplashturush pilani xelq'arada inkas qozghimaqta

Muxbirimiz qutlan
2016-07-11
Élxet
Pikir
Share
Print

Gerche Uyghur, tibet, mongghul, qazaq we bashqa az sanliq milletler isim-famililirining xitayche yézilishi we kompyutér sistémisigha kirgüzülüshide nurghun mesililer saqliniwatqan bolsimu, lékin bu qiyin mesilining bu yilning axirighiche "Téz sür'ette hel qiliwétilidighanliqi" xelq'aradiki közetküchilerning endishisini qozghimaqtiken.

B b s ning 8-iyuldiki xewirige qarighanda, xitay hökümitining xitaydiki az sanliq milletlerning isim-famililirining xitayche yézilishini qéliplashturush pilani shi jinpingning 2015-yili dékabirda "Milletler ittipaqliqi" témisi boyiche sözligen nutqidin kéyin derhal küntertipke qoyulghan iken.

Shi jinpingning nutqidin kéyin xongkong da'iriliri yéngi qarar maqullap xongkongdiki oqughuchilarning xitay chong quruqluqi bilen bolghan chüshinish we birdeklikni kücheytish uchün addilashturulghan xitay xétini öginishini tewsiye qilghan. Shuning bilen bir waqitta, tibet we Uyghur aptonom rayonluq da'irilermu öz tewesidiki yerlik milletlerning isim-famililirining xitayche yézilishini qéliplashturush ishini jiddiy küntertipke qoyghan.

Melumki, xitay isim-famililiri adette ikki yaki üch xitayche söz bilen, eng köp bolghandimu 4 xitayche söz bilen yézilidu. Xitay isim-famililirining pinyin asasidiki latinche herpler bilen yézilishimu 10 herptin ashmaydu. Bundaq ehwalda muhajirettiki Uyghur ziyaliyliri Uyghur we bashqa az sanliq milletler isim-famililirining xitayche yézilishining xitay isim-famililiri ölchimide qéliplashturulush éhtimalliqidin qattiq endishilenmektiken.

Toluq bet