Xitay da'iriliri islam hemkarliq teshkilati ezalirigha “Shinjang yaxshi jay” teshwiqati qilghan

Muxbirimiz irade
2022-01-07
Share

“Yershari imamlar kéngishi” xitayning Uyghurlargha qaritiwatqan irqiy qirghinchiliqini eyiblep bayanat élan qilghandin kéyin xitay da'iriliri musulman döletlirige qarita yéngi bir nöwetlik teshwiqat herikitini bashliwetken.

Xitayning tengritagh tori qatarliq hökümet taratqulirining xewiridin qarighanda, -1ayning 5-küni, xitayning tashqi ishlar ministirliqi, Uyghur rayonluq hökümet we xitayning se'udi erebistanida turushluq bash elchixanisi birlikte “Shinjang yaxshi jay − islam hemkarliq teshkilati wekiller ömikining shinjangni sintliq sayahet qilishi” pa'aliyiti ötküzgen.

Se'udi erebistan, misir, ereb birleshme xelipiliki, pelestin, pakistan, malaysiya, hindonéziye, qirghizistan, nigériye, kaméron qatarliq 36 döletning islam hemkarliq teshkilatida da'imiy turushluq wekilliri, mu'awin wekilliri we islam hemkarliq teshkilati katibat bashqarmisining emeldarliri qatarliqlar qatnashqan bu teshwiqat pa'aliyitide “Shinjangning atalmish tereqqiyati”, Uyghurlarning “Xushal-xoram yashawatqanliqi”, xitay hökümitining xitaydiki “Musulmanlarning bext-sa'aditige yüksek ehmiyet béridighanliqi” qatarliq mezmunlar asas qilin'ghan teshwiqat filimliri qoyulghan.

Xitay taratquliri bu heqtiki xewiride: “Islam hemkarliq teshkilati ezaliri junggoni qet'iy qollashni dawamlashturidighanliqini, purset bolsa shinjangni yene bir qétim ziyaret qilishni ümid qilidighanliqlirini ipadileshti” dégen.

Chet'ellerdiki Uyghur közetküchiler bolsa buni xitayning “Yershari imamlar kéngishi” élan qilghan chaqiriqtin jiddiyleshkenlikining ipadisi, dep qarimaqta.

“Yershari imamlar kéngishi” barliq islam mezhepliri we pikir éqimidiki musulman diniy dahiylarning dunyadiki tunji we eng chong dölet halqighan hökümetsiz orgini bolup, ular yéngi yil küni mexsus bir bayanat élan qilip barliq musulmanlarni Uyghurlargha irqiy qirghinchiliq qiliwatqan xitay hakimiyiti orunlashturghan béyjing qishliq olimpik musabiqisige qatnishishtin men'i qilghanidi.

Mezkur organ yene dunya Uyghur qurultiyi bilen birlikte “Xelq'ara islam hemkarliq teshkilati” we uninggha eza döletlerge mektup yollap ularni Uyghur mesilisidiki sükütini buzushqa, béyjing olimpik musabiqisini bayqut qilishqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet