Хунәнлик бир хитай “түркистан ислам партийәси” ни қоллап очуқ хәт елан қилғанлиқи сәвәблик 4 йиллиқ қамаққа һөкүм қилинған

Мухбиримиз қутлан
2014.12.01
Share on WhatsApp
Share on WhatsApp

“хунән гезити” ниң хәвиригә қариғанда, 28-ноябир күни хунән өлкиси хеңяң шәһәрлик оттура сот мәһкимиси җав феңшең исимлик бир хитайға “дөләт һакимийитини ағдурушқа қутратқулуқ қилиш” җинайити билән 4 йиллиқ қамақ җазаси бәргән.

Мәлум болушичә, өткән йили 11-айниң 26-күни җав феңшең хеңяң шәһиридики иҗарә өйидә торға чиқип “түркистан ислам партийәсиниң рәһбәрлиригә очуқ хәт” елан қилған. У бу хәтни хитай мәркизий телевизийиси шу күни тарқатқан “түркистан ислам партийәси тйәнәнменгә аптомобил билән һуҗум қилиш вәқәсигә мәсул болидиғанлиқини билдүрди” намлиқ хәвәрни көргәндин кейин язған.

У мәзкур хетидә “түркистан ислам партийәси” уюштуридиған келәр қетимлиқ һуҗум нишаниниң җуңнәнхәй болушини тәвсийә қилған. У йәнә һәрқайси өлкилик партком, һөкүмәт органлири шундақла юқири дәриҗилик компартийә әмәлдарлириға һуҗум қилиш арқилиқ хитай иқтисадини вәйран қилишни тәкитлигән. У хетиниң ахирида “түркистан ислам партийәси” ни өзиниң миллий вә диний чәмбирикидин һалқип тибәтләр билән һәмкарлишишини шундақла хитай компартийәси һакимийитигә зорлуқ васитиси билән тәһдит шәкилләндүрүшни оттуриға қойған.

У мәзкур хетини хитайчә елан қилғандин кейин, уни гугул аптоматик тәрҗимә көзники арқилиқ инглизчә вә әрәбчигә тәрҗимә қилип 3 тилда торға йоллиған. Хитайдики бирмунчә торкезәрлири униң очуқ хетигә инкас қайтурған.

Хеңяң шәһәрлик оттура сот мәһкимиси җав феңшең делоси үстидин мундақ һөкүм чиқарған: “у өзиниң турмуш әһвали вә сотсиялистик түзүмгә болған наразилиқини шикайәт қилиш үчүн тордин пайдилинип "түркистан ислам партийәси" гә очуқ хәт язған. Уларниң қоли арқилиқ дөләт һакимийити вә сотсиялистик түзүмни ағдурушқа урунған. Униң қилмиши дөләт һакимийитини ағдурушқа қутратқулуқ қилиш җинайити шәкилләндүргән.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.