Кишилик һоқуқ кеңишидә "ислам һәмкарлиқ тәшкилати" дөләтлири хитайниң уйғур ели вә хоңкоң сиясәтлирини қоллиған

Мухбиримиз ирадә
2020-07-07
Share

Алдинқи һәптә бирләшкән дөләтләр тәшкилати кишилик һоқуқ кеңишидә ечилған йиғинларда ислам һәмкарлиқ тәшкилатиға әза 22 дөләтниң хитай һөкүмитиниң уйғур елидики сиясәтлирини қоллиши күчлүк диққәт қозғиди.

"CNSNews" намлиқ хәвәр ториниң билдүрүшичә, алдинқи һәптә б д т ниң әң юқири кишилик һоқуқ оргини болған кишилик һоқуқ кеңишидә бир қисим дөләтләр хитай һөкүмитиниң әтрапиға зич уюшуп униң уйғур ели вә хоңкоңда қиливатқан кишилик һоқуқ дәпсәндичиликлирини қоғдиған. Хәвәрдә ейтилишичә, кишилик һоқуқ кеңишидә белорусийә башчилиқидики 46 дөләт хитай һөкүмитиниң уйғур елидә йолға қоюватқан сиясәтлирини ақлап ипадә билдүргән. Диққәт қозғайдиғини, бу дөләтләрниң ичидики 22 си уйғурларға тонуш болған "ислам һәмкарлиқ тәшкилати" ға әза мусулман дөләтләрдин тәшкил тапқан. Улар бәһрәйин, камерон, мисир, иран, ирақ, оман, пакистан, сәуди әрәбистан, судан, сүрийә, әрәб бирләшмә хәлипилики, йәмән вә пәләстин қатарлиқларни өз ичигә алиду.

Хитай ташқи ишлар министирлиқи болса юқиридики дөләтләрниң б д т кишилик һоқуқ кеңишидә бейҗиңниң хоңкоң вә уйғур елидики наразилиқ пәйда қиливатқан сиясәтлирини қоллиғанлиқиға рәһмәт ейтқан.

2019-Йили 7-айниң 10-күни б д т кишилик һоқуқ кеңишигә әза 22 дөләт хитайниң уйғур елидә йолға қойған лагер түзүми вә башқа тәқибләш сиясәтлирини қаттиқ тәнқид қилип ортақ баянат елан қилғандин кейин, хитай тәрәпму өзиниң уйғур елидики сиясәтлирини қоллайдиған 37 дөләт барлиқини давраң салған. Шу чағдиму хитай тәрәптә турған дөләтләрниң йеримидин көпрәки юқиридикигә охшашла "ислам һәмкарлиқ тәшкилати" ға әза дөләтләр иди. Әйни чағда сәуди әрәбистан вә пәләстин қатарлиқлар бу һәрикити сәвәблик хәлқаралиқ кишилик һоқуқ органлириниң күчлүк тәнқидигә учриған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт