Kishilik hoquq kéngishide "Islam hemkarliq teshkilati" döletliri xitayning Uyghur éli we xongkong siyasetlirini qollighan

Muxbirimiz irade
2020-07-07
Share

Aldinqi hepte birleshken döletler teshkilati kishilik hoquq kéngishide échilghan yighinlarda islam hemkarliq teshkilatigha eza 22 döletning xitay hökümitining Uyghur élidiki siyasetlirini qollishi küchlük diqqet qozghidi.

"CNSNews" namliq xewer torining bildürüshiche, aldinqi hepte b d t ning eng yuqiri kishilik hoquq orgini bolghan kishilik hoquq kéngishide bir qisim döletler xitay hökümitining etrapigha zich uyushup uning Uyghur éli we xongkongda qiliwatqan kishilik hoquq depsendichiliklirini qoghdighan. Xewerde éytilishiche, kishilik hoquq kéngishide bélorusiye bashchiliqidiki 46 dölet xitay hökümitining Uyghur élide yolgha qoyuwatqan siyasetlirini aqlap ipade bildürgen. Diqqet qozghaydighini, bu döletlerning ichidiki 22 si Uyghurlargha tonush bolghan "Islam hemkarliq teshkilati" gha eza musulman döletlerdin teshkil tapqan. Ular behreyin, kaméron, misir, iran, iraq, oman, pakistan, se'udi erebistan, sudan, süriye, ereb birleshme xelipiliki, yemen we pelestin qatarliqlarni öz ichige alidu.

Xitay tashqi ishlar ministirliqi bolsa yuqiridiki döletlerning b d t kishilik hoquq kéngishide béyjingning xongkong we Uyghur élidiki naraziliq peyda qiliwatqan siyasetlirini qollighanliqigha rehmet éytqan.

2019-Yili 7-ayning 10-küni b d t kishilik hoquq kéngishige eza 22 dölet xitayning Uyghur élide yolgha qoyghan lagér tüzümi we bashqa teqiblesh siyasetlirini qattiq tenqid qilip ortaq bayanat élan qilghandin kéyin, xitay terepmu özining Uyghur élidiki siyasetlirini qollaydighan 37 dölet barliqini dawrang salghan. Shu chaghdimu xitay terepte turghan döletlerning yérimidin köpreki yuqiridikige oxshashla "Islam hemkarliq teshkilati" gha eza döletler idi. Eyni chaghda se'udi erebistan we pelestin qatarliqlar bu herikiti seweblik xelq'araliq kishilik hoquq organlirining küchlük tenqidige uchrighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet