Kishilik hoquqni közitish teshkilati "Islam hemkarliq teshkilati" ni Uyghur rayonidiki kishilik hoquq depsendichilikige qarshi turushqa chaqirdi

Muxbirimiz erkin
2019-10-21
Élxet
Pikir
Share
Print

Kishilik hoquqni közitish teshkilati bayanat élan qilip, b d t kishilik hoquq kéngishige eza döletlerni, bolupmu "Islam hemkarliq teshkilati" ni Uyghur rayonidiki musulmanlarning kishilik hoquqining éghir depsende qilinishigha qarshi turushqa chaqirghan.

Bayanatta: "Biz eza döletlerni bolupmu islam hemkarliq teshkilatini shinjangdiki musulmanlargha qaritilghan keng kölemlik kishilik hoquq depsendichilikige qarshi söz qilishqa chaqirimiz. Kishilik hoquq aliy komissarining rayonda cheklimisiz musteqil tekshürüsh élip bérip, rayonning weziyiti heqqide melumat élish toghrisidiki chaqiriqini qollaymiz" déyilgen.

Bayanatta yene, türkiyede turushluq Uyghur musapir nurmemet toxtining a'ilisi misal keltürülüp, nöwette Uyghur balilirini ata-anilardin mejburiy ayriwétilishining texirsiz mesilisige aylan'ghanliqi tekitlen'gen. Nurmemet toxtining ayali bilen ikki perzenti 2016‏-yili anisi bilen yurtigha tughqan yoqlashqa qaytip ghayib bolghan. U, bu yilning bashlirida 4 yashliq oghlini xitayning bir sin teshwiqat körünüshidin tonup qalghanidi. Kishilik hoquqni közitish teshkilatning 18‏-öktebir élan qilin'ghan bayanatida tekitlinishiche, "Rayondiki musulman balilirining ata-aniliridin mejburiy ayriwétilip, tutup turush merkezliridek tikenlik sim we kaméralar orunlashturulghan terbiyelesh orunlirigha yerleshtürgenliki, ulardin xitayning teshwiqat naxshisini éytip, usul oynishi telep qilinidighanliqigha da'ir xewerlerdin kéyin, buninggha qarita kishilik hoquq kéngishining derhal heriketke ötüshi téximu jiddiy mesilige aylan'ghan."

Mezkur teshkilat bu yil 9‏-ayda jenwede ötküzülgen b d t kishilik hoquq kéngishining 42‏-nöwetlik yighinidimu bu mesilini otturigha qoyghanidi. Bu yil 6‏-ayda b d t kishilik hoquq kéngishige eza 25 döletning kishilik hoquq kéngishi prézidénti we kishilik hoquq aliy komissarigha mektup yézip xitayning Uyghur rayonida kishilik hoquqni éghir depsende qiliwatqanliqigha qarita chongqur endishisini ipadiligen. Arqidinla shimaliy koréye, wénuz'élla, süriye, birma qatarliq döletlerning mektup yézip, xitayni qollighanliqini bildürgenidi. Kishilik hoquqni közitish teshkilatining tekitlishiche, xitayni qollighan bu mektupqa islam hemkarliq teshkilatigha eza döletlerning yérimi imza qoyushni ret qilghan bolup, bu ulargha ilham bergen.

Toluq bet