Хитай һөкүмитиниң «ислам динини хитайчилаштуруш» урунушлири ғулғула қозғимақта

Мухбиримиз әзиз
2018-08-03
Елхәт
Пикир
Share
Принт

Хитай һөкүмитиниң ислам диниға қаратқан бесим қилиш һәрикәтлириниң уйғурлар дияридики мусулманлар аммисиға қандақ дишварчилиқларни пәйда қиливатқанлиқи йеқиндин буян йәнә кишиләрниң диққитини қозғимақта. «Асия католик бирләшмиси хәвәрлири» ниң 3-авғусттики баш мақалисидә көрситилишичә, ислам дининиң «хитайчилишиши» нөвәттә мусулманлар арисида өз тәсирини көрсәтмәктә икән.

Майкил сайнизбурий имзасидики бу мақалида көрситилишичә, хитайдики ислам диниға қаритилған бастуруш һәрикити хитай рәиси ши җинпиң 2015-йилида башлиған динға қарши урушниң бир тәркиби қисми икән. Бу «уруш» та ши җинпиң ғәрб тәрәптин кәлгән ислам дини вә христиан динини «хитайчилаштуруш» ни қәтий тәләп қилған. Буниң билән 16 яштин төвән кишиләрниң мәсчитләргә бериши мәни қилинған; мәсчитләргә хитайниң дөләт байрақлири есилған; мәсчитләрдики әзан канайлири юлуп ташланған; ислам услубидики һәрқандақ биналар өзгәртиш нишани болған.

Мақалида көрситилишичә, ши җинпиң қозғиған «динға қарши уруш» уйғурлар районида башқичә түс алған. Милйонлиған уйғурларниң диний етиқади яки диний етиқад билән юғурулуп кәткән турмуш адәтлири уларниң «өгиниш мәркәзлири» намида лагерларға қамилишиға сәвәб болған. Шуниң билән биргә пүткүл хитай тәвәсидә «ислам вәһимиси» йеңиваштин баш көтүрүшкә башлиған. Вашингтон шәһиридики җеймис тавн вәхпиниң хадимлиридин мат шрадер бу һәқтә сөз қилип «йеқиндин буян хитайда мусулманларни һақарәтләш мәзмунидики тор язмилири көпләп оттуриға чиқмақта. Бу хил ‹ислам вәһимиси' ниң вуҗудқа чиқишиға хитай һөкүмити сәвәбкар болмақта» дегән.

Пикирләр (0)
Share
Толуқ бәт