Xitay da'iriliri “Islamni xitaychilashturush” ni Uyghur rayonining 2022-yilliq muhim islahat nuqtilirining biri qilip békitken

Uyghur aptonom rayonluq partkom 3-aprél küni Uyghur élida 2022-yili élip bérilidighan islahatning muhim nuqtilirini élan qilghan. Xitay taratqulirining ashkarlishiche, Uyghur aptonom rayonluq partkomning omumiyyüzlük islahat komitéti 7 sahediki 32 xil türning 100 xil nuqtiliq islahat tedbirini élan qilghan.

Xewerde bu islahat tedbirlirining térorluqqa qarshi turush, muqimliqni qoghdashni da'imiylashturush, “Shinjangda islamni xitaychilashturush”, “Shinjangni medeniyet bilen ozuqlanduru'osh” ni téximu chongqurlashturushni öz ichige alidighanliqi tekitlen'gen.

Xewerde éytilishiche, bu arqiliq idé'ologiye sahesidiki bixeterlikni qoghdap, “Jongxu'a milliti ortaq idiyesi” téximu chongqur emeliyleshtürülidiken, shundaqla uzun muddetlik muqimliq we eminlikning idiyewi asasi téximu mustehkemlinidken. Lékin közetküchiler, atalmish bu islahat tedbirlirining xitayning rayondiki Uyghurlargha qaratqan assimilatsiye qilish we xitaylashturush siyasitide özgirish bolmayla qalmastin, belki uning téximu kücheytilidighanliqi we normallashturulidighanliqidin dérek béridighanliqini bildürmekte.

Xitay hökümiti 2017-yili bashlan'ghan chong tutqun bilen bir waqitta Uyghur élini keng kölemlik xitaylashturush herkiti bashlap, uninggha “Shinjangni medeniyet bilen ‍ozuqlandurush” dep nam bergen idi.

“Shinjang géziti” ning xewer qilishiche, islahat tedbirliride yene bingtu'en islahati chongqurlashturulup, bingtu'enning alahide rolini jari qildurush, yerlik bilen bingtu'enning qoshuwétilishi algha sürülidiken. Xewerde yene qaramay shehirining “Medeniyet bilen ozuqlandurushni omumiyyüzlük qanat yaydurushning sinaq nuqtisi qilinidighanliqi, xoten wilayitidiki kent we ijtima'iy rayonlarning mexsus tüzüm islahati sinaq nuqtisi qilinidighanliqi tekitlen'gen.