Izmirda réyno térrorchisi bilen chétishliq dep qaralghan bir guruppa kishi tutulghan

Muxbirimiz shöhret hoshur
2017.01.04

Türkiye saqchiliri istanbuldiki réyno réstoranini qan'gha boyighan térrorchining közitish apparatlirida qaldurghan izigha asasen, uning hujumni élip barghan küni istanbulning Uyghur, qazaq we özbék qatarliq köchmenliri köprek olturaqlashqan zeytinburnu rayonidin taksi bilen yolgha chiqqanliqini bayqighan we deslepki künlerde zeytinburnuni merkez qilghan halda axturush élip barghan, arqidin térrorchining weqedin burun türkiyening konya wilayitide öy ijarige alghanliqi we u yerde 3 köchmen a'ile bilen alaqide bolghanliqi, bu öch a'ilining weqedin kéyin köchüp ketkenliki ashkarilan'ghan.

Türk saqchiliri bu izni qoghlash jeryanida bügün, 9 nepiri er, 11 neper ayal we 20 balidin teshkillen'gen bir guruppa gumanliq kishilerni tutqan. Xewerlerde nöwette tekshürülüwatqan bu kishilerning sherqi türkistanliq we daghistanliq ikenliki tilgha élinmaqta. Höriyet gézitining xewiride déyilishiche, bu gumanliq kishilerning yénidin birqanche döletke tewe bolghan 41 pasport, oqdan xaltisi we durbun qatarliq esliheler tépilghan.

Höriyet gézitining tünügünki xewiride, térrorchining qirghizche, rusche we azraq türkche bilidighanliqi yézilghan idi, yene bir xewerde bolsa, uning hujumdin kéyinki qéchish sepiride zeytinburnudiki bir Uyghur réstoranida ishlewatqanlardin pul élip taksichigha bergenliki bayan qilin'ghan. Térrorchining kimliki heqqidiki uchurlarning qirghiz yaki Uyghur bolush éhtimalliqigha merkezlishishi muhajirettiki Uyghur pa'aliyetchilirini jiddiyleshtürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.