Rabiye qadir istanbuldiki kechlik kulub térrorluq hujumi gumandarining Uyghurlargha baghlinip xewer qilinishidin bi'aramliqini bildürdi

Muxbirimiz irade
2017-01-05
Share

Istanbuldiki réyno kechlik kulubida yéngi yil axshimi küni wehshiy térrorluq hujumini élip barghan jinayet gumandarining Uyghur bolushi mumkinliki heqqidiki xewerler muhajirettiki Uyghurlarni qattiq bi'aram qildi. Bügün Uyghur milliy herikiti rehbiri rabiye qadir xanim türkiye axbaratlirigha jawaben qilghan bayanatida, térrorchi kim bolushidin qet'iynezer weqeni “Uyghurlar yaki sherqiy türkistan'gha baghlashqa bolmaydighanliqi”ni bildürdi.

Türkiyede yüz bergen bu hujumdin “Hemmidin bek sherqiy türkistan xelqining perishan bolghanliqi”ni bayan qilghan hem weqening jawabkarliqini “Islam döliti teshkilati” ning üstige alghanliqini eskertken rabiye qadir xanim “Térrorchini özi we tewe bolghan teshkilatning nami bilen atash kéreklikini, herqandaq millet yaki weten nami bilen atashqa bolmaydighanliqi”ni bildürdi.

Uyghur kishilik hoquq fondining tor bétide élan qilin'ghan bu bayanatta, Uyghurlarning ana wetini xitay ishghaliyiti astida turuwatqan, Uyghur xelqi xitay qoralliq qisimliri teripidin qirghin qilinishqa uchrawatqan bügünki weziyette, eger Uyghurlarning ichidin biri chet'eldin düshmen izdigen bolsa, uni Uyghur dégili bolmaydighanliqi, türkiyege oxshash Uyghur xelqige quchaq échiwatqan bir döletke hujum qilsa bu hujumning Uyghurlargha qilin'ghan hujum we xiyanet bolidighanliqi bildürüldi.

Istanbulda yéngi yil kéchisi yüz bergen térrorluq weqeside aptomatliq bir térrorchi kechlik kulubqa bésip kirip kulubtikilerni qara-qoyuq oqqa tutqan we netijide 39 kishining ölümi we 60 tin artuq     kishining yarilinishini keltürüp chiqarghan idi. 4 Kündin béri türkiye saqchiliri mezkur térrorchini qolgha chüshürüsh üchün keng kölemlik opératsiye élip barmaqta. Birqanche kündin béri türkiye axbaratlirida élan qiliniwatqan xewerlerde térrorchining ottura asiyaliq ikenliki jezmleshtürülgen bolsimu, emma uning qirghiz, özbék, Uyghur we daghistanliq bolush éhtimalliqliri tilgha élinip kéliwatatti.

Biraq, türkiye mu'awin bash ministiri weysi qaynaq peyshenbe küni élan qilghan eng yéngi bayanatida, bu térrorchining Uyghur bolushi éhtimali barliqini bildürdi we türkiye xewpsizlik organlirining uning yoshurunup yatqan yérini asasen mu'eyyenleshtürgenlikini éytti. Roytérs agéntliqining éytishiche, türkiye saqchi da'iriliri peyshenbe küni istanbulning sélim pasha rayonida bu térrorchigha yardem qilghanliq gumani bilen yene bir qisim kishilerni tutqun qilghan. Buning bilen bu térorchigha chétilip tutqun qilin'ghan adem sani 36 neperge yetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet