Türkiye taratqulirining réyna kéchilik kulubini qan'gha boyighan térrorchining kimliki heqqidiki tikishi toxtimighan xewerliri dawamlashmaqta

Muxbirimiz qutlan
2017-01-09
Share

Türkiyediki “Milliyet” we “Hürriyet” qatarliq chong gézitler 7-yanwar küni istanbul emniyet mudirliqi teminligen uchurlargha asaslinip, yéngi yil kéchisi réyna kéchilik kulubini qan'gha boyighan térrorchining abdulqadir mashripof isimlik özbék ikenlikini, uning “Ebu muhemmed xurasani” dégen kod isimni ishletkenlikini xewer qilghan idi.

Buning bilen pütün dunyadiki Uyghur jama'itining, jümlidin türkiyediki Uyghurlarning köngli mezkur térrorluq weqesi heqqide türkiye taratquliri peyda qilghan axbarat wehimisidin waqtinche bolsimu aram tapqan idi. “Türkiye awazi” radiyosining Uyghurche qanilimu “Milliyet” géziti tarqatqan xewerge asaslinip, “Reyna kulubigha hujum qilghan térrorchining kimliki melum boldi” serlewhelik xewer bérip, türkiyediki Uyghurlarning köngli tinjighanliqini bildürgen idi.

Halbuki, “Milliyet” géziti bügün, yeni 9-yanwar küni bashqiche xewer bérip, ortaköydiki reyna kéchilik kulubini qan'gha boyighan térrorchi abdulqadir mashripofni hujumgha teshkilligen kishining “Hoshurqari abliz isimlik 21 yashliq sherqiy türkistanliq biri” ikenlikini bildürgen.

Xewerde tilgha élin'ghan “Hoshurqari abliz” ning ismi “Milliyet” gézitide xitayche pinyin bilen yézilghan. Uning 2016-yili 21-aprél küni xitay pasporti bilen türkiyege kirgenliki, réyna paji'esi yüz bérishtin ikki hepte burun uning konyadin istanbulda yashaydighan bir tughqinigha tapancha bilen oq ewetkenliki we özbék térrorchi abdulqadir mashripof bilen téléfonda sözleshkenliki bildürülgen.

Halbuki, türkiye hökümet organliri yaki saqchi tereptin bu tepsilatlarni jezmleshtüridighan resmiy bayanat hazirghiche bérilmigen.

Muhajirettiki Uyghur teshkilatliri bilen siyasiy pa'aliyetchiler türkiye taratqulirining térrorchining kimliki heqqide 10 kündin buyan bir-birige zit hem tikishi toxtimighan xewerlerni bérip, Uyghur jama'iti arisida délighulluq peyda qiliwatqanliqidin qattiq epsuslan'ghanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet