Italiye “Bir belbagh bir yol” din chékin'gen bolsimu, mejburiy emgek mehsulatlirigha chek qoymidi
2024.05.08
Italiye ötken yili xitayning “Bir belbagh bir yol” pilanidin chékin'gen birdinbir yawropa döliti bolup qalghan we maxtashlargha sazawer bolghanidi. Halbuki italiye izchil türde xitayning mejburiy emgekke baghlinishliq mehsulatlirigha qarita import cheklimisi qoymighanliqi melum.
Kishilik hoquqni qoghdash teshkilatliridin “Muhapizetchi” (Safeguard Defenders) ning bash diréktori lawra xart (Laura Harth) 8-may küni bu heqte X de élan qilghan uchurida, “Italiye Uyghur rayonidin biwasite kélidighan poyizgha qachilan'ghan mejburiy emgek mehsulatlirining italiye zéminigha kirishige yol qoydi” dégen we buning italiyening “Bir belbagh bir yol” pilanidin chékinishi bilen tüptin sighishmaydighan heriket ikenlikini bildürgen.
“Muhapizetchi” teshkilati bilen amérikadiki Uyghur kishilik hoquq qurulushi we amérika Uyghur birleshmisi bu mesile toghruluq italiyening amérikadiki elchisige kolléktip mektup yollighan. Mektupta italiye hökümitini ottura yawropa tömür yolidin italiyege éqip kiriwatqan mejburiy emgek mehsulatlirini tekshürüshke chaqirghan.
Mektupta mundaq déyilgen: “Ötken yilning axirida démokratik döletler we xelq'ara taratqular italiye hökümitining 2019-yil xitay bilen tüzgen ‛bir belbagh bir yol‚ kélishimini bikar qilghanliqini alqishlighanidi. Halbuki xitayning ‛bir belbagh bir yol‚ liniyesi boyiche ottura yawropadin ötidighan tunji poyizi mejburiy emgek mehsulatlirini bésip, italiye zéminigha kirdi. Biz xelq'ara kishilik hoquqni ilgiri sürüsh teshkilatliri bolush süpitimiz bilen italiyening kishilik hoquq we soda exlaqi wedilirige xilap bolghan bu herikitidin endishe qiliwatimiz”.
Mektupta yene xitayning Uyghur rayonidiki mejburiy emgek siyasiti we uning xitay teshebbus qiliwatqan “Bir belbagh bir yol” bilen chemberchas baghlan'ghanliqi pakitliq we tepsiliy bayan qilin'ghan.