Үрүмчи шәһиридики аһалиләр даириләр тәрипидин «иттипақлиқ тамиқи» йейишкә орунлаштурулған

Мухбиримиз ирадә
2018-07-18
Елхәт
Пикир
Share
Принт

Үрүмчи шәһиридә даириләр тәрипидин «иттипақлиқ тамиқи» йейиш паалийити кәң қанат яйдурулмақта икән.

Тәңритағ хәвәрләр ториниң бүгүнки хәвиридин қариғанда, үрүмчи шәһиридики тәңритағ районлуқ һөкүмити йеқинда кичик қовуқ кочисида мәхсус «иттипақлиқ тамиқи» йейиш паалийити уюштурған. Бу паалийәткә районидики һәр милләт аһалиси вә шундақла шу әтраптики тиҗарәт орунлири қатарлиқлардин тәшкилләнгән 15 гуруппа қатнишип, һәммә милләтниң өзгичә тамақлирини тәйярлашқан вә һәммиси бирликтә бу аталмиш «иттипақлиқ» тамиқиға еғиз тәгкән.

Уйғур елидә нөвәттә мусулманчә ашханиларниң вивискисиға «һалал» яки «мусулманчә» дегән сөзләрни йезишму «радикаллиқ аламити» дәп қарилип, бирдәк әмәлдин қалдурулмақта. Бундақ бир шараитта уйғур қатарлиқ мусулман хәлқләрниң хитайлар билән «иттипақлиқ тамиқи» йейишкә орунлаштурулуши уйғур көзәткүчиләрниң күчлүк диққитини қозғиди.

Һөкүмәт даирилири өткән йилиниң башлиридин башлап «һалал» лиққа даир бәлгиләрни мәни қилиш тәдбирлирини уйғур елиниң җай-җайлириға кеңәйтип, уйғурлар билән хитайлар билән ортақ тамақ йәйдиған һәрикәтни охшимайдиған усулларда елип бармақта. Уйғурлар чаған мәзгилидә аталмиш хитай туғқанлири билән җувава йейишкә орунлаштурулмақта. Америка хәлқара диний әркинлик комитети 2018‏-йиллиқ доклатида юқиридики әһвалларни тилға елип, хитай һөкүмитиниң уйғурларға қаратқан юқиридики бу сиясәтлирини қаттиқ тәнқид қилған.

Уйғур аптоном райони 2017 ‏-йили 4‏-айда чиқарған «әсәбийликни түгитиш низами» да йәнә һалаллиқ пәрһизигә әмәл қилиш, яғлиқ чигиш, сақал қоюш қатарлиқ 15 хил хаһиш һәрикәт «әсәбийлик» дәп бекитилгән. Уйғур елидики йепиқ тәрбийә лагеридин қоюветилгән қазақистан пуқраси өмүрбәк «вашингтон почтиси» гезитигә ашкарилиған учурида лагердикиләрниң җаза орнида чошқа гөши йейишкә мәҗбурлинидиғанлиқини, «диний радикал» дегән қарилаш билән тутқун қилинғанларниң һарақ ичишкә мәҗбурлинидиғанлиқини, буларға чидимиған бәзи кишиләрниң өлүвелишқа урунғанлиқини ейтип бәргән иди.

Пикирләр (0)
Share
Толуқ бәт