Jenét yéllén amérikaning xitay bilen “Saghlam riqabet” qilishni ümid qilidighanliqini éytqan

Washin'gtondin muxbirimiz erkin teyyarlidi
2023.07.07

Xitayda ziyarette boluwatqan amérika maliye ministiri jenét yéllén 7-iyul xitay bash ministiri li chyang bilen körüshkende, amérikaning xitay bilen “Ghelibe qilghuchi hemmige érishidighan” emes, belki “Saghlam riqabet” qilishni ümid qilidighanliqini bildürgen. Roytérs agéntliqining xewer qilishiche, jenét yéllén xitay bash ministirigha qilghan sözide yene bu ziyaritining dunyadiki ikki chong iqtisadiy gewdining téximu köp we da'imliq alaqe qanallirini échishini ümid qilidighanliqi, her ikki döletning kilimat özgirishi qatarliq dunyawi xirislargha “Rehberlik qilish” mejburiyiti barliqini éytqan.

Jenét yéllénning xitaygha qaratqan 4 künlük ziyariti amérikaning baydén hökümiti xitaygha qarita arqa-arqidin iqtisadiy cheklesh tedbirlirini yürgüzüwatqan bir waqitta élip bérilghan. Roytérs agéntliqining éytishiche, jennét yéllén béyjingda qilghan sözide washin'gtonning “Bezi ehwallarda dölet bixeterlikini qoghdash üchün qaratmiliqi bolghan tedbirlerni qollinishqa éhtiyajliq” ikenliki, emma bu xil tedbirlerdiki ixtilap téximu keng munasiwetke tesir yetküzmesliki kéreklikini éytqan. Jenét yéllén mundaq dégen: “Belkim biz bu xil ehwallarda ixtilapqa chüshüp qélishimiz mumkin. Emma biz her qandaq bir ixtilapning ikki tereplik iqtisadiy we pul-mu'amile munasiwitimizni orunsiz nacharlashturuwétidighan uqushmasliq keltürüp chiqirishigha yol qoymasliqimiz kérek.”

Jenét yéllén yene “Biz ghelibe qilghuchi hemmige érishidighan emes, belki adil  qa'ide-tüzüm bilen waqitning ötüshige egiship her ikki döletke nep yetküzidighan saghlam riqabetni qoghlishimiz” dep körsetken. Shuning bilen bir waqitta, jenét yéllén béyjingning amérika shirketlirige kashila chiqiriwatqanliqinimu tenqid qilghan. U amérikaning ittipaqdash döletler bilen béyjingning “Adaletsiz iqtisadi pa'aliyetliri” ge qarshi turudighanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.