Jang xeytaw a'ilisining amérikagha qéchip kélishimu Uyghur éli weziyitini yorutup berdi

Muxbirimiz irade
2017-12-28
Élxet
Pikir
Share
Print

Xitay hökümitining Uyghur élidiki siyasetlirini tenqidligenliki üchün 19 yilliq qamaq jazasigha höküm qilin'ghan xitay adwokat jang xeytawning ayali oghli bilen birlikte yéqinda amérikigha qéchip kelgen idi. Bu weqe bilen teng xitay hökümitining Uyghur élide yürgüzüwatqan qattiq qol siyasetliri yene bir qétim xelq'araliq axbaratlarning kün tertipige keldi.

Amérika birleshme agéntliqi bu heqtiki xewiride, xitay hökümitining Uyghur élide éghir teqib we bésim siyasiti yürgüzüsh bilen bir waqitta yene, bu siyasetlerge tenqidiy pikirde bolghanlarnimu intayin éghir jazalawatqanliqini bayan qildi. Xewerde éytilishiche, jang xeytawning adwokati jang eger xitayning bashqa ölkiliride bolghan bolsa köp bolghanda üch yil késilidighanliqini emma u "Shinjangda bolghanliqi üchün mushundaq éghir jazalan'ghanliqi" ni bildürgen.

Jang xeytaw eslide Uyghur élide bir éléktr mehsulatliri satidighan adettiki bir ishchi bolup, u xitay hökümitining Uyghurlargha qaratqan milliy we dini siyasetlirini eyiblep köp qétim "Sina blogi" we ündidargha özining pikirlirini yollighan. Xitay soti uni 2016-yili sotlighanda: "Jang xeytaw 2010‏-yilidin 2015‏-yilighiche tor betlerge 274 parche yollanma yollap, kompartiye we uning siyasetlirige hujum qilip, töhmet chaplidi. Chet'el muxbirlirining ziyaritini qobul qilip, ularni süret bilen teminlidi" dep, uni "Döletni aghdurushqa qutratquluq qilish" we "Chet'elge jasusluq qilish" dégen jinayetler bilen eyibligen. Jang xeytaw 19 yilliq qamaqqa höküm qilin'ghandin kéyin uning ayali li eyjé izchil halda xitay hökümitining aware qilishigha uchrighan.

Birleshme agéntliqining xewiride yene, qeshqerdiki bir méhmanxana xojayininingmu bu yil aprélda "Wéybo" da Uyghur élidiki siyasetke a'it we din'gha a'it ikki parche maqalini hembehirligenliki üchün qolgha élin'ghanliqi bildürülgen hem shundaqla ömürlük qamaq jazasigha höküm qilin'ghan Uyghur ziyaliysi ilham toxtimu buninggha misal qilip körsitilgen. Mezkur xewer "Jenubiy xitay sehiri" géziti qatarliqlar teripidinmu tarqitildi.

Toluq bet