Җасуслуқ җинайити билән қолға елинған америка деңиз армийә офитсери сотқа тартилди

Мухбиримиз җүмә
2016-05-21
Елхәт
Пикир
Share
Принт


Хитай яки тәйвәнгә һәрбий мәхпийәтликләрни йәткүзүш җинайити билән қолға елинғанлиқи ашкариланған америка деңиз армийә офитсери лин җйеляң (едвард лин ) 17 - апрел һәрбий сотқа тартилған.

Сот америкиниң виригинийә штатиға җайлашқан норфолк деңиз армийә базисида ечилған.

Америка деңиз армийә тәтқиқат җәмийити тор бетидә берилгән хәвәргә қариғанда, сотта линға «икки қетим җасуслуқ җинайити садир қилиш, 3 қетим җасуслуқ җинайити садир қилишқа урунуш бир нәччә қетим қәтий мәхпий һөҗҗәтләрни бир тәрәп қилишта бихәстәлик қилиш қатарлиқ җинайәт» ләр артилған.

Wawy 10 - Қанилиниң хәвәр қилишичә, лин 2012 - сентәбирдин 2013 - декабирғичә бир қетим, 2012 - апрелдин 2014 - йили майғичә бир қетим мәхпий һәрбий учурларни чәтәл хадимлириға тапшурған.

У тапшурған учурлар 2 - дәриҗилик қәтий мәхпий мәлуматлар категорийәсигә киридикән.

Лин сотта өзигә артилған җинайәтләрни рәт қилип, өзи үстидин заседатилларму иштирак сот ечилишини тәләп қилған. Униң келәр қетимқи соти бу йил июнниң бешиға орунлаштурулған.

Бу йил апрелниң бешида америкиниң деңиз армийә офитсери едвард линниң хитайға һәрбий мәхпийәтликләрни йәткүзүш гумани билән қолға елинғанлиқи ашкариланған.

Едвард линниң әсли исми лин җйеляң болуп, тәйвәндә туғулған вә 14 йешида ата - аниси билән америкиға келип йәрләшкән, 2008 - йили америка пуқралиқиға өткән икән.

Мәлум болушичә лин җйеляң 2015 - йили 11 - сентәбир америкиниң һавай арилидин хитайға қарап учуш алдида қолға елинған.

Ташқи сиясәт хәвәрләр ториға қариғанда, лин 2015 - йили авғустта америка федератсийә тәкшүрүш идарисиниң чәтәл җасуси сияқиға киривалған мәхпий хадимлириға америкиниң һәрбий мәхпийәтликлирини йәткүзгән вә шу арқилиқ тузаққа чүшүрүлгән икән.

Едвард лин 2014 - йилидин башлап америкиниң әң илғар һәрбий разведка вә йәр йүзини тәкшүрүш айропилани п - 8 посейдон вә п - 3 орион айропиланлирини ишлитидиған алаһидә патурул ескадрониниң командири болған икән.

Мәлум болушичә, едвард лин америка федератсийә тәкшүрүш идариси хадимлири тәрипидин 11 саәт сорақ қилинған вә сорақ җәрянида барлиқ җинайәтлирини иқрар қилған. У өткән йили сентәбирдин бу йил апрелда сотқа елип чиқилғанға қәдәр мәхпий қамалған.

Пикирләр (0)
Share
Толуқ бәт