Xitay chet'ellerdiki Uyghurlarni jasusluqqa ündeshni dawam qilmaqta

Muxbirimiz eziz
2018-11-13
Share

Yillardin buyan xitay hökümitining chet'ellerdiki Uyghur jama'itige téléfon urush yaki uchur yollash arqiliq ularni özliri üchün "Köz-qulaq" bolup bérishke dewet qilip kéliwatqanliqi heqqide xewerler otturigha chiqip kelmekte. Yéqinda xitay hökümitining bu usulni qaytidin bazargha salghanliqi ashkara bolmaqta.

"Shiwétsiye radiyosi" ning 9-noyabirdiki xewiride éytilishiche, xitay dölet bixeterlik organlirining bir qisim xadimliri shiwétsiyediki Uyghurlargha téléfon bérish we élxet yollash arqiliq bir qisim kishilerni özliri üchün jasusluq qilip bérishke dewet qilghan. Shuningdek shiwétsiyediki we bashqa jaylardiki Uyghurlarning alaqidar uchurlirini toplap bérishke buyrughan.

En'gliyede chiqidighan "Musteqilliq" gézitining 12-noyabir sanidiki mexsus maqalida éytilishiche, xitay hökümiti türkiyediki bir qisim Uyghurlarni özliri üchün jasusluq qilishqa qiziqturmaqchi bolghan. Shulardin biri bolghan eysa isimlik bir yash buni ret qilghanda xitay saqchiliri "Sen'ghu türkiyede özüngni saq-salamet dep oylishing mumkin. Emma bu jaydiki qérindashliring we bashqa tughqanliringni qandaq qilisen?" dep qorqutqan. Shundaqla "Sen qeyerge ketsengmu biz séni tapalaymiz" dep heywe qilghan.

Uyghurlar mesilisi boyiche izdiniwatqan mutexessislerdin runiy sténbérg xitay hökümitining bu qilmishidiki asasiy meqsetning néme bolushi heqqide söz qilip: "Ularning nishani muhajirettiki Uyghurlargha bésim peyda qilish, shu arqiliq ularni parchilash we Uyghurlar arisigha guman uruqi térish" dep körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet