Хитайниң йеңи “җасуслуқ қануни” дики мүҗмәл нуқтилар әндишә қозғиди

Мухбиримиз шөһрәт һошур
2017.12.06

Хитай мәркизи һөкүмити бүгүн 3 йилдин буян йолға қоюп келиватқан “җасуслуқ қануни” ға йеңидин қетилған мадда вә тәбирлирини елан қилған.

Хәлқара хәвәрләрдә дейилишичә, хитай 2014-йили елан қилған мәзкур қанунида җасуслуқ һәрикәтлири һәққидә дәсләптила көплигән мүҗмәл ениқлима вә тәбирләр бар болуп, бу қетим мәзкур җинайи һәрикәтниң даириси кеңәйтилгәндин сирт йәнә бир қисим нуқтилар мүҗмәлликини давамлаштурған.

Америка авази радиосиниң хәвиридә диққәт қилинишичә, мәзкур қанунниң бирмунчә маддисида “вә башқа җасуслуқ һәрикәтлири”, “вә башқа дөләт бихәтәрликигә тәһдит йәткүзидиған һәрикәтләр”, “вә башқа қанунсиз материяллар” қатарлиқ мүҗмәл ениқлимилар мәвҗутлуқини сақлиған һәм кеңәйтилгән.

Хәвәрдә әскәртилишичә, маддилардики бу мүҗмәллик даириләрниң дитиға яқмиған һәрқандақ бир шәхс яки һәрикәтни җасуслуқ билән әйиблишигә пурсәт яритип бериши, пуқраларниң һәқ-һоқуқиниң техиму асан қилинишиға йол ечип бериши мумкин.

Мәзкур қанунда мәхпий хәт йезиш үскүниси, мәхпий тиңшаш әсваби вә мәхпий номур дәптири қатарлиқ интернет дәвригә аит адәттики үскүнә-әслиһәләрниң җасуслуқ материяллири даирисигә киргүзүлгәнлики хәлқара хәвәрләрдә алаһидә тилға елинди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.