Xelq'ara kechürüm teshkilati: "'kespiy terbiye' dégini yalghan, u jaza lagérliri"

Muxbirimiz shöhret hoshur
2018-10-17
Élxet
Pikir
Share
Print

Uyghur aptonom rayonining re'isi shöhret zakir aldinqi küni xitay hökümet taratqulirigha qilghan sözide rayondiki yighiwélish lagérlirining "Heqsiz kespiy terbiyelesh orunliri" ikenlikini bayan qilghan idi. Bügün, yeni17-öktebir küni xelq'ara kechürüm teshkilati shöhret zakirning bu sözlirige qarita jiddiy inkas qayturdi.

Xelq'ara kechürüm teshkilati bu heqtiki bayanatida xitay taratqulirining herqandaq bir burmilishining nöwette Uyghur rayonida bir milyondin artuq insan qamilip yatqan yighiwélish lagérlirini perdazliyalmaydighanliqini tekitligen. Bayanatta nahayiti ochuq qilip mundaq déyilgen: "U hergizmu 'kespiy terbiye merkizi' emes, belki jaza lagérliridur."

Bayanatta lagérlargha a'it xewerlerning üzülmey chiqip turuwatqanliqi, bu lagérlarda achliq, qéyin-qistaq we zorluq-zombuluqlarning dawam qiliwatqanliqi shundaqla kommunistik idiyening tutqunlargha mejburiy téngiliwatqanliqi bildürülgen. Bayanatta yene bu orunlarni "Heqsiz kespiy terbiye merkizi" dep perdazlashning özimu shu lagérda solinip yatqan gunahsiz tutqunlar we ularning a'ile tawabi'atlirigha qilin'ghan haqaret ikenliki eskertilgen.

Bayanatta yene Uyghurlarning chet'elni ziyaret qilishi we chet'ellerdiki uruq-tughqanliri bilen alaqilishishiningmu xitay da'iriliri teripidin "Diniy esebiylik" ning alamiti dep qariliwatqanliqi emeliy misallar bilen yorutulghan. Bayanatta xitay da'irilirining taghdek pakitlargha köz yumush we uni burmilinip körsitishning ornigha Uyghur diyarida nöwette zadi néme ishlarning yüz bériwatqanliqini dunyagha ashkarilishi telep qilin'ghan.

Toluq bet