Җеҗияң өлкисиниң ақсу вилайитигә 15 милярд йүән мәбләғ селиши диққәт қозғиди

Мухбиримиз ирадә
2020-06-11
Елхәт
Пикир
Share
Принт

Хитайниң җеҗияң өлкиси ақсу вилайитидә 30 дин артуқ санаәт түригә 15 милярд йүән мәбләғ салидикән. Хитай һөкүмити уйғурларни уйғур елиниң ичи вә сиртида «ишқа орунлаштуруш» намида мәҗбурий әмгәккә селиватқан бир мәзгилдә ақсуға бундақ зор миқдарда мәбләғ селиниши диққәт қозғиди.

Шинхуа ториниң бу һәқтики хәвиригә қариғанда, бу йил ақсу вилайити вә биңтуәнгә қарашлиқ арал шәһириниң җеҗияң өлкисигә бөлүп берилгәнликигә 10 йил толған болуп, икки тәрәп бундин кейинки һәмкарлиқлирини йәниму күчәйтиш үчүн ақсу вилайитидә қаттиқ детал санаәт бағчиси, пул-муамилә сода мәркизи вә яңақ пишшиқлап ишләш, тоқумичилиқ вә кийим-кечәк, енергийә мәнбәлирини ечиш, 5G техникисини омумлаштуруш қатарлиқ саһәләр бойичә келишкән. Бу түрләргә селинидиған мәбләғниң омумий қиммити 15 милярд йүәндин ешип кетидикән.

Хәвәрдә җеҗияң өлкиси ақсу вилайитигә 10 йилдин буян 60 милярд йүәнгә йеқин «ярдәм бәргән» лики вә 96 миңдин артуқ иш орни яратқанлиқи илгири сүрүлгән, бирақ җеҗияң өлкисиниң буниңдин қанчилик пайда алғанлиқи вә бу хизмәт орунлирида кимләрниң ишқа орунлашқанлиқи ениқ тилға елинмиған.

Чәтәлләрдики уйғур көзәткүчиләр һазир уйғур әмгәк күчлири һәдәп төвән мааш билән мәҗбурий әмгәкчиләргә айландурулуватқан бир мәзгилдә хитай карханилириниң һәссиләп пайда елиш үчүн уйғур елигә көпләп кириватқанлиқини әскәртип, уйғур елидики мәҗбурий әмгәк мәсилисигә хәлқараниң диққитини тартишниң зөрүрлүкини тәкитләшти.

Пикирләр (0)
Share
Толуқ бәт