Amérika jenubiy déngizda xitaygha qarshi herbiy heriketlirini kücheytmektiken

Muxbirimiz irade
2019-04-25
Élxet
Pikir
Share
Print

Igilik hoquqi talash-tartishta turuwatqan jenubiy déngizda amérika bilen xitay arisidiki sürkilishning küchiyidighanliqi mölcherlenmekte.

24-Aprél küni amérika-xitay munasiwetliri heqqide tetqiqat bilen shughullinip kéliwatqan joséf bosko teripidin "Töpilik" (The Hill) zhurnilida élan qilin'ghan mulahizide amérika-xitay arisida soghuq urush éhtimalining yuqiriliqini, amérikining pat arida jenubiy déngizda xitayning zomigerlikige taqabil turush üchün teyyar bolidighanliqini bildürgen.

Aptorning bayan qilishiche, bu hepte ichide xitay déngiz armiyesi xitay xelq azadliq armiyesi qurulghanliqining 70 yilliqini xatirilesh munasiwiti bilen chingdaw porti arqiliq bir qisim herbiy paraxotlirini déngizda parat qilduridiken we bu arqiliq etraptiki qoshna döletlerge we dunyagha öz küchini köz-köz qilidiken.

Del shu peytte amérikining déngiz sahili mudapi'e qisimlirigha tewe ikki herbiy paraxoti amérikan déngiz armiyesining herbiy paraxotliri bilen birlikte jenubiy déngizda seper qilidiken. Ularning meqsiti xitay xelq azadliq armiyesining déngizdiki heywisige heywe bilen taqabil turush iken.

Melum bolushiche, adette déngiz sahili mudapi'e qisimliri amérika dölet xewpsizliki ministirliqigha qarashliq bolidiken. Peqet urush mezgilliridila andin amérika déngiz armiyesi bilen birlikte heriket qilidiken. Shunga yuqiriqi ikki qisimgha a'it paraxotlarning jenubiy déngizda ortaq heriket qilishi tramp hökümitining jenubiy déngizda xitaygha qarshi keskin iradisini namayan qilidiken.

Aptorning körsitishiche, 2001-yili gerche amérika xitaydin kélidighan tehditke diqqet qilishqa bashlighan bolsimu, emma "11-Séntebir weqesi" din kéyin amérikining diqqiti pütünley ottura-sherqqe burulup ketken iken. Biraq yéqinda "Dölet xewpsizliki istratégiyesi" doklatida "Xitay bilen rusiye amérikaning asasliq riqabetchiliri" dep körsitilgendin béri amérika hökümiti qaytidin diqqitini xitaygha merkezleshtürgen.

Aptor joséf bosko maqalisining axirida sirilankada yüz bergen yéngi térrorluq hujumliri gherbning diqqitini yene bashqa tereplerge buriwetmesliki kéreklikini, chünki amérika-xitay munasiwetliridiki bundaq tarixi burulush nuqtisining emdi yene kelmeydighanliqini eskertken.

Toluq bet