Amérika: xitayning jenubiy déngizda sün'iy arallarni yasishi tinchliqqa paydisiz

Muxbirimiz erkin
2015.05.01

Amérika dölet ishlar ministirliqi jüme küni xitayning jenubiy déngizdiki igilik hoquqi talash-tartishtiki rayonlarda déngizni tindurup sün'iy aral yasighanliqigha inkas bildürüp, bu arallar qandaq meqset üchün yasalghan bolsun, u rayonning tinchliqigha paydisiz, dédi.

Roytérs agéntliqining xewer qilishiche, xitay déngiz armiye qomandani wu shingli yéqinda amérika déngiz armiyisi urush qilish bölümining bashliqi, adiméral grénard bilen téléfonda sözliship, xitayning sün'iy aral yasash qurulushini aqlighan. U, junggoning jenubiy déngizda élip bériwatqan qurulushi, shu rayonning hawa rayidin aldin melumat bérishke, déngizda qutquzush élip bérishqa paydiliq, dégen. Shuning bilen birge, amérika qatarliq döletler xitay yasighan bu arallardin paydilinishni xalisa qarshi alidighanliqini bildürgen.

Biraq amérika dölet ishlar ministirliqi bayanatchisi, amérikining bu mesilidiki meydanini tekitlep, “Amérikining meydani shu, igilik hoquqi talash-tartishtiki rayonda déngizni tindurup aral yasashning tinchliqqa héchqandaq paydisi yoq.

Xitayning jenubiy déngizdiki arallarning mutleq köp qismida igilik hoquqi barliqini dawa qilip, yene shu rayonda déngizni tindurup sün'iy aral yasishi, u arallarda ayropilan uchush yoli yasishi filippin, wiyétnam qatarliq döletlerni jiddiy endishige salghan. Yéqinda, sherqiy -jenubi asiya ittipaqi bayanat élan qilip, xitayning bu herikitige jiddiy diqqet qiliwatqanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.