Jenubiy déngiz weziyitining jiddiyleshkenliki melum

Muxbirimiz jüme
2015-10-28
Share

Amérika da'iriliri xitay sün'iy arallarni yasap “Özining” dep élan qilghan déngiz tewelikidin herbiy kémilerni ötküzgendin kéyin, mezkur déngiz weziyitining jiddiyleshkenliki melum.

Amérika xitay sün'iy aral yasighan spratél ariligha 12 déngiz mili kélidighan jaygha USS Lassen namliq bashqurulidighan bombilar bilen qorallan'ghan urush paraxotini ewetken.

Seyshenbe küni xitay amérikining bash elchisini chaqiritip naraziliq bildürgen we amérikini herbiy “Ighwagerchilik” bilen eyibligen idi.

Halbuki, seyshenbe küni amérika dölet mudapi'e ministiri ashtun katér dölet mejliside chaqirilghan guwahliq bérish yighinda amérikining mezkur rayondiki herbiy meshghulatlarni dawam qilidighanliqini bildürdi.

U mundaq dédi: xelq'ara qanun yol qoyghaniken, biz bu rayonda yene uchimiz we meshghulat qiliwérimiz.

U yene mundaq dédi: yéqinqi bir nechche kündin buyan bu yerde déngiz armiye meshghulati élip bérildi, bu xil meshghulatlar aldimizdiki ay-künlerde yene köplep élip bérilidu.

Xitay jenubiy déngizning spratél, parasél aralliri tewesige bir nechche sün'iy arallarni yasap, wiyétnam, filippin we teywen qatarliq döletlerning étiraz bildürüshige uchrighan.

Xitayning mezkur arallargha ayropilan uchush yollirini yasighanliqi otturigha chiqqandin kéyin, amérika rayon weziyitige téximu jiddiy diqqet qilishqa bashlighan.

Seyshenbe kündiki axbarat élan qilishi yighinda xitay tashiqi ishlar ministirliki bayanatchisi lu kang xitayning aral mesiliside herbiy heriket qollinidighan, yaki qollanmaydighanliqi heqqidiki so'allardin özini qachurghan.

Halbuki, charshenbe küni xitayning dölet igidarchiliqidiki “Yershari waqit géziti” obzor élan qilip, jenubiy déngizda amérika bilen urush qilishtin yanmaydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet