Америка билән җәнубий корейәниң бирләшмә һәрбий маневири башланди

Мухбиримиз шөһрәт һошур
2017.08.21

“улчи әркинлик мудапиәси” дәп нам берилгән америка-җәнубий корейә һәрбий маневири бүгүн башланди.

Җәнубий корейә президенти мун җәйен башлиниш мурасимидики сөзидә, бу маневирниң пәқәт мудапиә характерлик икәнликини, шималий корейәниң арал вәзийитини йәниму җиддийләштүрүш үчүн буни бир баһанә қиливалмаслиқини әскәртти.

Йилда бир қетим өткүзүлидиған бу маневирни, шималий корейә һәр қетим “шималий корейәни бесивелишниң тәйярлиқи” дәп әйибләп вә шуниңға қарита ядро қораллири синиқини давамлаштуруп кәлгән иди.

Хитай ташқи ишлар баянатчиси хуа чүнйиң бүгүн бу һәқтики баянатида, хитайниң мәзкур маневирни нөвәттики җиддийчиликни пәсәйтишкә вә барлиқ тәрәпләр арисида музакирини илгирилитишкә пайдисиз дәп қарайдиғанлиқини илгири сүрди.

Материялларда көрситилишичә, шималий корейә билән җәнубий корейә арисида 60 нәччә йил аввал уруш тохтиған болсиму, әмма уруш тохтитиш келишими түзүлгән әмәс, нөвәттә американиң 28000 әскири җәнубий корейәдә вәзипә өтимәктә. Буниң ичидин 17 миң нәпири бу қетимқи маневирға қатнашқан, маневир 31-авғустқа қәдәр давам қилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.