Җәнубий корейә президент мунниң хоңкоң вә уйғур мәсилилиридә хитайни қоллиғанлиқини рәт қилди

Мухбиримиз әркин
2019-12-25
Елхәт
Пикир
Share
Принт

Җәнубий корейә президент мәһкимиси 24‏-декабир баянат елан қилип, хитай тәрәпниң җәнубий корейә президенти мун җи ун хоңкоң вә уйғур мәсилилиридә хитайниң сияситини қоллиди, дегән сөзлирини рәт қилған.

Җәнубий корейә президенти мун җи ун, японийә баш вәзири шинзо абе вә хитай рәиси ши җинпиң 23‏-декабир күни бейҗиңда учришип, японийә‏-җәнубий корейә‏-хитай 3 тәрәп башлиқлар сөһбити елип барған.

Хитай ташқи ишлар министирлиқи ши җинпиң билән мун җе унниң учришишида җәнубий корейә президентиниң хоңкоң вә уйғур мәсилисидә хитайниң сияситини қоллиғанлиқини билдүргән. Хитай ташқи ишлар министирлиқи мун җи унниң хоңкоң билән уйғур мәсилиси хитайниң «ички иши», «хитайниң бу мәсилидики сияситини қоллаймиз» дегәнликини илгири сүргән иди.

Лекин «җәнубий хитай әтигәнлик почтиси» гезитиниң хәвәр қилишичә, җәнубий корейә президент мәһкимисиниң баянатчиси ку мин җуң өзлириниң юқириқи мәсилиләрдә хитайни қоллиғанлиқини рәт қилған. Ку мин җуң 24‏-декабир елан қилған баянатида президент мун җе унниң ши җинпиң билән көрүшкәндә хитайниң хоңкоң билән уйғур мәсилиси хитайниң «ички иши» дегән мәйданини «яхши хатиригә алғанлиқи» ни билдүргәнлики, лекин униң бу мәсилидики сияситини қоллаймиз демигәнликини тәкитлигән.

Ку мин җуңниң билдүрүшичә, «учришишта ши җинпиң хоңкоң вә шинҗаң мәсилисиниң ички иши икәнликини чүшәндүргән, президент мун җе ун униң сөзлирини яхши хатиригә алғанлиқини билдүргән.»

Бу қетимқи учришишта японийә баш вәзири шинзо абему хоңкоң вә уйғур мәсилисини оттуриға қойған. У «хитай һөкүмитиниң (шинҗаң) вәзийитигә очуқ-ашкара чүшәнчә беришини үмид қилидиғанлиқи» ни билдүргән. японийә һөкүмитиниң баянатчиси отаканиң японийә таратқулириға билдүрүшичә, ши җинпиң шинзо абениң сөзлиригә қарита хоңкоң мәсилиси хитайниң «ички иши» икәнликини тәкитлигән. Лекин отака шинзо абениң уйғурлар тоғрисидики сөзигә немә дәп җаваб бәргәнликини чүшәндүрмигән.

Пикирләр (0)
Share
Толуқ бәт