Uyghurlar jenwede namayish qilip, b d t kishilik hoquq aliy komissarining “Shinjang doklati” ni élan qilishini telep qildi

Muxbirimiz erkin
2022.05.13
Share on WhatsApp
Share on WhatsApp

Yawropadiki her qaysiy döletliridin kelgen yüzligen Uyghur namayishchi, lagér shahitliri, parlamént ezaliri, Uyghur, tibet we xongkong teshkilatlirining wekilliri 13-may b d t ning jenwediki binasi aldida axbarat yighini we namayish ötküzüp, yéqinda Uyghur ilini ziyaret qilidighan b d t kishilik hoquq aliy komissari mishél bachélétqa chaqiriq qilghan.

Chaqiriqta mishél bachélétni b d t kishilik hoquq aliy komissariyatining ötken yili teyyarlap hazirgha qeder élan qilmighan “Shinjang doklati” ni élan qilishi, uning yéqinda élip baridighan sherqiy türkistan ziyaritide lagérlarni tekshürüshi, shundaqla ziyarettin burun Uyghurlarning wekilliri bilen körüshüshni telep qilghan.

Dunya Uyghur qurultiyining pilanlishi, yawropadiki her qaysiy Uyghur teshkilatlirining qollishida ötküzülgen bu axbarat yighini we namayishta teshkilat wekilliri, parlamént ezaliri, lagér shahitliri sözge chiqqan, shundaqla Uyghur teshkilatliri b d t kishilik hoquq aliy komissarining ishxanisigha xet tapshurup, uning Uyghur élida élip baridighan ziyaritining ishenchilik bolushigha da'ir teleplirini bildürgen. Namayishta lagér shahiti qelbinur sidiq sözge chiqip, bachélétning Uyghurlar heqqidiki doklatni derhal élan qilishi, uning sherqiy türkistan'gha barghanda lagérlarni tekshürüshini telep qilghan.

U mundaq dégen: “Bachélét xanimning sherqiy türkistan'gha ziyaretke bérishtin burun Uyghurlar heqqide yazghan shu doklatni ‍élan qilishini chin dilimizdin ümid qilimiz” hem “Sherqiy türkistan'gha barghanda xitayning teyyarlap qoyghan sehnisi, xitayning körsetken jaylirini emes, belki lagér shahitliri yatqan hem shu jayda körüshke tégishlik yerlerni körüshini éwe ziyaret qilishini, qaytip kelgendin kéyin xitayning epti-beshirisini pütün dunyagha échishini ‍ümid qilimiz.”

Ötken hepte dunyadiki 200 din artuq teshkilat chaqiriq élan qilip, bachélétning Uyghur élida élip baridighan ziyariti eng eqelliy shertlerni hazirlimighanliqi tüpeyli kéchiktürülüshini telep qilghan. 13-May jenwede élip bérilghan chong kölemlik bu namayish b d t kishilik hoquq aliy komissarining Uyghur éli ziyaritige kölenggü chüshken bir shara'itta ‍ötküzülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.